Մենք 1000 դրամները չենք տալիս իշխանությանը, տալիս ենք բանակին. Փաշինյանը կողմ կքվեարկի օրենքին

Այսօր ԱԺ արտահերթ նիստում քննարկվում է ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին օրենքի նախագիծը երկրորդ ընթերցմամբ ընդունելու մասին հարցը: Ըստ նախագծի` յուրաքանչյուր աշխատող քաղաքացի պետք է ամսական 1000 դրամ փոխանցի հիմնադրամին:

Ելույթ ունեցավ ՀԱԿ խմբակցության պատգամավոր Նիկոլ Փաշինյանը: Նա կարծիք հայտնեց, որ այս նախագծով հնարավորություն է ստեղծվում զինծառայողների սոցիալական խնդիրը դնելու ինստիտուցիոնալ լուծման հիմքի վրա, նախագիծ, որը կազատի վիրավորված կամ հաշմանդամ դարձած զինծառայողների ընտանիքների անդամներին պետական մարմինների կամ օլիգարխների դռների առաջ ժամեր ու օրեր անցկացնելուց: Եվ պետության թալանչի, կոռումպացված լինելը որպես փաստարկ բերելը Փաշինյանը սխալ է համարում, թեև հստակ գիտի, որ պետությունը թալանչի է ու կոռումպացված:

«Եթե հանկարծ այս օրենքը չընդունվի, պետությունը կդադարի՞ թալանչի ու կոռումպացված լինելուց: Մենք ի՞նչ պետք է պատասխանենք ուսման վարձ չունեցող զոհված զինծառայողի երեխային: Ասելու ենք. «Բալի'կ ջան, քանի որ պետությունը թալանչի է ու կոռումպացված, քո հայրն էլ պատերազմում զոհվել է, դու գնա, օլիգարխների կլիպներում մանեկենություն արա կամ օրերդ անցկացրու գերատեսչությունների դռների տակ, մինչև մենք կանենք իշխանափոխություն, Հայաստանում կհաստատենք օրինականություն: Դե, եթե պետությունը կոռումպացված է, եկեք կոչ անենք, որ ոչ ոք չգնա բանակ` ծառայելու, այդպես կլինի՞»,- հարց ուղղեց պատգամավորը:

Փաշինյանը ներկայացրեց իր դիրքորոշումը` զոհված զինծառայողի ընտանիքը չպետք է մնա որևէ մեկի բարեգործության հույսին, դա նվաստացուցիչ է զինծառայողի ընտանիքի համար: «Մենք այս 1000 դրամները չենք տալիս իշխանությանը, մենք դա տալիս ենք բանակին»,- ասաց նա:

Պատգամավորի ելույթը տեղից ընդմիջեց Զարուհի Փոստանջյանը, ով վրդովվեց` ասելով, որ Փաշինյանի ասածները սխալ են, այդպես չի կարելի ասել, քանի որ այդ գումարները գնալու են իշխանության գրպանը:

ԱԺ նախագահի տեղակալ Էդուարդ Շարմազանովը կոչ արեց Զարուհի Փոստանջյանին, որ հարգի կանոնակարգը ու չխանգարի Փաշինյանին:

Փաշինյանը շարունակեց` ասելով, որ բանակը կարեկցանքի ու հանգանակության, նաև բարեգործության սուբյեկտ չէ, զոհված զինծառայողի ընտանիքը չպետք է կարեկցանքի ու բարեգործության սուբյեկտ լինի, որովհետև այդ ընտանիքը մեզ պետք է կարեկցի: Իհարկե, շատ մարդիկ շատ միջոցներ ուղարկեցին բանակ, սակայն, պատգամավորի խոսքով, այդ ամենը պետք է կազմակերպված լինի:

Փաշինյանը օրինակ բերեց հեռադիտակներ բանակ ուղարկելը, երբ վերջում պարզվեց, որ դրանք ինֆրակարմիր լույսեր ունեն և թիրախ են հակառակորդի դիպուկահարի համար: «Ես կողմ եմ քվեարկելու այս նախագծին, և ոչինչ չի ստիպի ինձ` կողմ չքվեարկել այս նախագծին»,- ասաց նա: