Դրսում Հրանուշն է համայն հայերի նախագահը, ներսում՝ Դուք. Արամ Մանուկյանը՝ նախարարին

Այսօր ԱԺ-ում քննարկվում էր սոցիալական ոլորտին հատկացվող բյուջեն: Հիմնական զեկուցող` աշխատանքի եւ սոցիալական հարցերի նախարար Արտեմ Ասատրյանին հարց ուղղեց ՀԱԿ խմբակցության քարտուղար Արամ Մանուկյանը: Նա անդրադարձավ ժողովրդագրական խնդիրներին` հարցնելով, թե ի՞նչ համակարգային ու ռազմավարական մոտեցում է նախատեսել կառավարությունը այդ շատ լուրջ խնդիրները լուծելու համար:

«Արտագաղթը շարունակվում է, իսկ ձեր ոլորտում ընդգրկվածների թիվը` շատանում: Դրսում Հրանուշն է, նա կդառնա համայն հայերի նախագահ, ներսում Դուք եք: Ձեր ոլորտը մեծանում է, որովհետև եկամուտ ստեղծողն արտագաղթում է, մնում են ծերերը, երեխաները: Որտե՞ղ է Ձեր լավատեսությունը` դաժան դեմոգրաֆիական խնդիրների դեմն առնելու համար: Միևնույն է, միջոցառումներով խնդիրներ չեն լուծվում, համակարգային ռազմավարություն է պետք»,- ասաց Արամ Մանուկյանը:

Արտեմ Ասատրյանը նշեց, որ աղքատության ու գործազրկության դեմը հնարավոր է առնել տնտեսության աճով, բիզնես միջավայրի լավացմամբ, որ երկրում առավելագույն բարիք ստեղծվի, որն էլ սոցիալական ոլորտում արդար պետք է բաշխվի: Նախարարի խոսքով` կառավարության ծրագիրն ուղղված է հենց պատգամավորի մատնանշած խնդիրների լուծմանը:

«Ունենք ներդրված համակարգեր, որոնք հասցեական են դարձնում սոցիալական ոլորտի հատկացումները, որ յուրաքանչյուր դրամ առավելագույն հասցեականություն ունենա: Իհարկե, բավարար չեն հատկացումները, բայց մեզ տրված հնարավորությունների շրջանակում ենք փորձում գործել»,- ասաց նախարարը: