Բոլոր նախարարություններում էլ գործառույթների հստակեցման կարիք կա. Վարդան Բոստանջյան

Տնտեսագետ Վարդան Բոստանջյանը, Yerkir.am-ի հետ զրույցում անդրադառանալով կառավարության կազմում տեղի ունեցող կառուցվածքային փոփոխություններին, նշեց, որ խոսքը մեխանիկական փոփոխությունների մասին չէ, այլ՝ ֆունկցիաների հստակեցման: «Բոլորս գիտենք, որ Հայաստանի տնտեսական համակարգը  գտնվում է սարսափելի վիճակում: Հիմա այս  համակարգ կոչվածում արմատական, համակարգային  փոփոխություններ են պետք: Փաստորեն, մեր ունեցած  կառուցվածքում,  բազմաթիվ լիազորություններ, որ ամրագրված են առանձին ոլորոտներում, միևնույն ժամանակ չունեն շեշտադրված գերակայություններ»,- ասաց Բոստանջյանը՝  հավելելով. «Օրինակ, եթե խոսենք  էկոնոմիկայի նախարարության մասին,  այստեղ, հանգամանքների բերումով, բազմաթիվ գործառույթներ են ֆիքսված եղել՝ զբոսաշրջություն, ներդրումային քաղաքականություն և այլն: Սրանք բոլորն էլ չափազանց կարևոր ճյուղեր են: Երկրում որոշակի տեղաշարժեր, փոփոխություններ և ուղղորդված  վեկտորական զարգացում իրականացնելու համար  հարկավոր  է  այդ բոլոր գործառույթներից փնտրել, ընտրել գերակաները»:

Տնտեսագետի խոսքով՝ Հայաստանի համար չափազանց կարևոր են ներդրումները. «Մեր ներդրումային միջավայրը բավականաչափ տխուր վիճակում է, գրավիչ  չէ, ինչպես օտարերկրյա ներդրողների, այնպես էլ՝ հայրենական ներդրողների համար: Անգամ փոքր տնտեսական շրջանառություն իրականացնող տնտեսվարող սուբյեկտը գտնվում է անտանելի ռիսկի տակ: Տնտեսական մրցակցության բացակայության պարագայում մի քանի սուբյեկտներ, օլիգոպոլ և մոնոպոլ նկրտումներով, խեղդել են բոլորին: Փոքր ու միջին բիզնեսն է տուժում դրա արդյունքում, որը ցանկացած երկրի զարգացման կարևորագույն ինստիտուտն է: Երկրի  բնակչության ճնշող մեծամասնությունը՝ 75 տոկոսը, գտնվում է  այդ տիրույթում, և եթե դու այդ տիրույթը խեղդում ես, նշանակում է դու խեղդում ես քո բնակիչներին»:

Բոստանջյանի խոսքով՝ շատ կարևոր է՝ լիազորությունների հստակ  ձևակերպում լինի: «Ցանկացած պարագայում պետք է հանձնարարությունները, գործառույթները  չափելի, հստակ լինեն ու թափանցիկ: Մենք այդ առումով դեռ խնդիրներ ունենք, բոլոր նախարարություններում էլ գործառույթների  հստակեցման կարիք կա: Նոր վարչապետն արդեն իսկ շեշտադրել է իր գործողության ծրագիրը: Գրեթե վեց ամիս հետո պարզ կլինի՝այսօր գծագրված, ամրագրված նախարարությունները պե՞տք են, թե՞ պետք չեն, շա՞տ են, թե՞ քիչ են»,- եզրափակեց մեր զրուցակիցը: