Այն, ինչ եղավ 2013 թվականին, դրանից վատ այլեւս հնարավոր չէ. Վարդան Բոստանջյան

2014 թվականը, անկախ ամեն ինչից, լինելու է շատ լավ տարի, որովհետեւ, այն, ինչ եղավ 2013 թվականին, դրանից վատ այլեւս հնարավոր չէ. Yerkir.am-ին ասաց տնտեսագետ Վարդան Բոստանջյանը' ամփոփելով 2013 ու կանխատեսելով 2014 տնտեսական տարիները: Այս առումով, կարծիք հայտնեց տնտեսագետը, 2014 թվականին կլինեն ավելի տրամաբանված, հավասարակշռված մոտեցումներ:

Վարդան Բոստանջյանը 2013 թվականի տնտեսական պրոցեսների ֆոնին դրական դիտարկումներ հակված չէ կատարել:

«Համենայն դեպս չեմ կարծում, որ եթե ինչ-որ բան էլ դրական է եղել, ապա պայթուցիկ դրական բաներ չեն եղել, որ հիմա արժե դրանց մասին բարձրաձայնել: Անգամ եթե դրական ինչ-որ բաներ էլ եղել են, ապա աննշան բաներ են եղել»,- շեշտեց մեր զրուցակիցը:

Իսկ բացասական զարգացումների մասով էլ նա արագ-արագ թվարկեց' գազի սպառման հետ հարաբերություներում մենք ունեցանք ոչ թափանցիկություն, ավելորդ քաշքշուկ, որը, նրա կարծիքով, մինչ օրս շարունակվում է: Մասնավորապես' նշեց տնտեսագետը, պարտքային պարտավորություններ են ստեղծված, որոնց մասին հասարակությունը չգիտի, բայց այդուհանդերձ դրա հետեւանքները պետք է կրի նույն բնակիչը' հասարակությունը:

Հաջորդիվ' Վարդան Բոստանջյանը մեկ անգամ եւս հիշեցրեց կենսաթոշակային  ապահովության'իր իսկ բնորոշմամբ' «կամավոր-պարտադիր ռեժիմի» մասին, որը, նրա բնութագրմամբ,  ըստ էության շատ անտրամաբանական մի բան է. «ինչի՞ մասին է խոսքը' կամավոր-պարտադիր, երբ հասարակությունն ինքը հակված չէ այդ ինստիտուտին»,- ասաց Վարդան Բոստանջյանը:

Մյուս բացասական պրոցեսն էլ, տնտեսագետի դիտարկմամբ, միություններում հանգրվանելու ինստիտուտն էր. «Երկար տարիներ, կարծես, մեծ աշխատանքներ էին ընթանում եվրաասոցացման եւ խորն ու համապարփակ ազատ առեւտրի համաձայնագրերում հանգրվան գտնելու ուղղությամբ: Այստեղ բախումն այն էր, որ մենք տվյալ դեպքում կտրուկ փոխեցինք մեր դիրքրորոշումը: Այս բոլորը թողնում են իրենց բացասական ազդեցությունն, ընդհանրապես, 2013 թվականի վրա»,- անդրադարձ կատարեց Վարդան Բոստանջյանը:

Վերջում նա ներկայացրեց իր լավատեսական ենթադրությունն, ըստ որի, 2014 թվականին վերոհիշյալ հարցերը հավանաբար լուծում կստանան, ու կկարողանանք ավելի լավ զարգացումների սպասել: