90 ոչխար տարել են, 35-ին էլ` հոշոտել կամ վիրավորել. Կուտականում գայլերը հարձակվել են ոչխարների հոտի վրա

Սեպտեմբերի 7-ին սահմանամերձ Կուտական գյուղում գայլերի ոհմակը հարձակվել է 277 ոչխարից և գառներից բաղկացած հոտի վրա:

Yerkir.am-ի հետ զրույցում Կուտականի գյուղապետ Ահարոն Աբրահամյանը նշեց, որ, ընդհանուր առմամբ, գայլերը հոշոտել կամ վիրավորել են 35 ոչխարի, իսկ 90-92 ոչխար էլ «հետները» տարել են:

«Սարեր-ձորերով փնտրել ենք, մի քանի անասուն ենք գտել միայն: Հովիվը 40 ոչխար ուներ, 40-ից 5-ն է մնացել: Վիրավոր անասուններից մի քանիսին մորթել ենք, չգիտենք` ինչ անենք: Մարզպետարանից եկել են, նայել, տույժերը գրել ու խոստացել, որ կօգնեն: Սպասում ենք»,-ասաց Աբրահամյանը:

Նա նշեց նաև, որ գայլերի հարձակումներ էլի են եղել, բայց առաջին անգամ է, որ գյուղը նման խոշոր չափի վնաս է կրում.«Մի ոչխարի գինը 30 000 է, դե, հաշվեք` 125 ոչխար ենք կորցրել, է»: