Զինված տղաները հանձնվեցին, որովհետև հասկացան, որ իրենց օգտագործում են

Այսօր լրագրողների հետ հանդիպման ժամանակ «Ազգային անվտանգություն» կուսակցության նախագահ Գառնիկ Իսագուլյանն ամփոփեց վերջին 15 օրերը` ՊՊԾ գունդը գրավելուց ի վեր: Նրա խոսքով՝ իրավապահ մարմինները օր ու գիշեր ամեն ինչ արեցին, որ արյունահեղություն չլինի: Ըստ Իսագուլյանի`որևէ նախադեպ չունի այդ դեպքը, երբ զինված խումբը մտնում է պետական նշանակության զինվորական մասին, գրավում է այն, 15 օր պարալիզացնելով պետական մարմինների աշխատանքը, բայց այդ պետական մարմիններն արեցին ամեն ինչ որ զոհ չլինի:

«Իմ անունից շնորհակալություն եմ հայտնում հանրապետության նախագահին իր համբերության և կատարած աշխատանքի համար, շնորհակալություն եմ հայտնում նաև ուժային կառույցներին կատարած աշխատանքի համար: Այդ 15 օրերին բոլորի աչքից հեռու հարյուրավոր հանդիպումներ են եղել, և ես ասել եմ, որ բացի Վիտալի Բալասանյանից ոչ ոք չի կարող միջնորդական դեր ստանձնել զինյալ խմբի հետ բանակցություններում: Այդ բանակցությունները երբեք էլ չեն ընդհատվել: Զինված տղաները հասկացան մեկ պարզ բան, որ իրենց, ըստ էության, օգտագործում են, և շատ շատերին պետք է իրենց մահն ու արյունը, որ գործընթացները ստանան այլ շարունակություն: Ահա ինչու նրանք զենքը վայր դրեցին: Աշխարհում աննախադեպ էր այն, որ նրանց նկատմամբ մարդկային վերաբերմունք ցույց տրվեց, հանձնվելուց հետո, նման ցուցում էր տվել երկրի նախագահը»,- ասաց Գառնիկ Իսագուլյանը՝ հավելելով, որ Վիտալի Բալասանյանը մեկ շաբաթից գալու է Արցախից ու հանդիպելու է ՊՊԾ գունդը գրաված տղաների հետ:

Գառնիկ Իսագուլյանը տարակուսած էր, թե ինչպես այս օրերի ընթացքում ապատեղեկատվություն տարածեցին քաղաքագետ Արա Պապյանը, Արցախում ընդդիմադիր գործիչ Վահան Բադասյանը, որոնց հայտարարությունները շատ վտանգավոր են եղել:

«Տղաների պաշտպանության գործին լծվել է Վիտալի Բալասանյանը և երկրի նախագահը, ավելի լավ է՝ ոչ ոք չխառնվի այդ գործընթացին, ու կտեսնեք, որ ամեն ինչ արդար կլինի»,- ասաց Իսագուլյանը: