Հասկացան, թե ինչո՞ւ է Նոյը որոշել այստեղ իջնել

Հոկտեմբերի 20-21-ը Երեւանում իր աշխատանքները գումարված Եվրոպական շարժման միջազգային կոնգրեսի առաջնորդներ Փաթ Քոքսը եւ Շառլ Ֆերդինանդ Նոթոմբը երեկ այցելել են Էրեբունի ամրոցի միջնաբերդ եւ թանգարան` ծանոթանալու Երեւանի հնագույն պատմությանը:

«Էրեբունի» պատմահնագիտական արգելոց-թանգարանի տնօրեն Գագիկ Գյուրջյանի հետ շրջելով ամրոցի միջնաբերդում` նրանք հետաքրքրվել են ուրարտական բերդաքաղաքի պատմության մանրամասներով, ինչպես նաեւ դիտել են արգելոց-թանգարանի մշտական ցուցադրության մեջ ներկայացված պեղածո նյութերը` Էրեբունիից, Շենգավիթից եւ Կարմիր բլուրից:

Պատվավոր հյուրերն իրենց տպավորություններն են գրառել արգելոց-թանգարանի հուշամատյանում: Փաթ Քոքսը, ով ազգությամբ իռլանդացի է, հին իռլանդերեն գիրը նմանեցրել է ուրարտական սեպագրին եւ իր նախնիների լեզվով գրել է. «Անչափ տպավորված եմ այս այցելությունից»: Իսկ Բելգիայի պետնախարար Շառլ Ֆերդինանդ Նոթոմբը թողել է հետեւյալ գրառումը. «Փորձելով մեզ համար բացահայտել Երեւանը` մենք հասկացանք, թե որտեղ է Նոյը որոշել իջնել»: