Արծվիկ Մինասյանը ապագա տնտեսագետներին հանձնեց իրենց դիպլոմները

Այսօր ԵՊՀ-ում տեղի ունեցավ  տնտեսագիտության և կառավարման ֆակուլտետի շրջանավարտների ավարտական դիպլոմների հանձնման արարողությունը, որին ներկա էր նաև ՀՀ էկոնոմիկայի նախարար Արծվիկ Մինասյանը: Լրագրողների հետ զրույցում նա հավաստիացրեց, որ կրթական բարձր չափանիշներին համապատասխան սերունդ են գործուղում դեպի կյանք: Նախարարի համոզմամբ` տնտեսագիտական ֆակուլտետի առանձնահատկությունը այն է, որ այն նկատի է առնում ն աև տվյալ պահին շուկայի դրսևորած առաջարկներն ու պահանջարկը, և կրթական ծառայությւոններ է  մատուցում այդ պահանջներին համապատասխան:

«Մեր տնտեսության և հասարակական կյանքի բոլոր ոլորտներում այս ուսանողներն իրենց տնտեսագիտական գիտելիքները պետք է վերածեն կյանքի: Տնտեսագիտությունը մի գիտություն է, որը հասարակական կյանքի բոլոր ոլորտներում պահանջված է: Այլ խնդիր է, որ շատ հաճախ, շուկայական տնտեսության պայմաններում անընդհատ փոփոխոիւթյունների է ենթարկվում գիտելիքների նկատմամբ պահանջմունքները: Ինչպես տնտեսությանն է բնորոշ, այստեղ էլ կան լուրջ խնդիրներ` սկսած ոլորտում առկա մրցակցային վիճակից, ավարտած որակի ապահովմամբ»,- ասաց Արծվիկ Մինասյանը` հույս հայտնելով, որ ԵՊՀ տնտեսագիտության ֆակուլտետը իր բարձրության վրա կգտնվի, ինչպես միշտ է գտնվել: