ԼՂ հարցը փորձում են վերցնել Հայաստանի ձեռքից. Արա Պապյան

Օրեր առաջ Երևանում կայացել էր ՀԱՊԿ նախարարների խորհրդի նիստը, որը հայտարարություն ընդունեց ԼՂ կարգավորման վերաբերյալ: « Աջակցություն ենք հայտնում մայիսի 16-ին Վիեննայում և հունիսի 20-ին Սանկտ Պետերբուրգում Լեռնային Ղարաբաղի հիմնախնդրի վերաբերյալ տեղի ունեցած գագաթաժողովներում ձեռք բերված պայմանավորվածություններին՝ ուղղված հակամարտության գոտում իրավիճակի սրման կանխարգելմանը, իրադրության կայունացմանը և խաղաղ բանակցային գործընթացի առաջ մղման համար պայմանների ստեղծմանը»,- ասվում է դրանում:

Այսօր, խոսելով այդ հայտարարության մասին, «Մոդուս վիվենդի» կենտրոնի ղեկավար քաղաքագետ Արա Պապյանը լրագրողներին ասաց, որ Հելսինկյան փաստաթուղթը շատ է գերագնահատվում, այն ժողովի արձանագրությունն է ամրագրել, որը վերաբերում էր Երկրորդ համաշխարհային պատերազմից հետո առաջացած սահմաններին: «Ադրբեջանը չի ունեցել և չունի միջազգայնորեն սահմանված տարածքներ, նա հավակնում է Ադրբեջանական ՍՍՀ սահմաններին, որը հիմք չունի: ՀԱՊԿ նախարարների խորհրդի այդ հայտարարությունը ռուսական կողմի ակտիվության դրսևորման ցուցադրում էր: Սանկտ Պետերբուրգի բանակցությունները ծածուկ էին, և եթե դա հիմնվել է Կազանի փաստաթղթի վրա, ապա Հայաստանը պետք է հանձնի հինգ շրջանները: Ներկայումս ստեղծվել է խիստ անորոշ ու բարդ իրավիճակ, որը կարող է բերել պատերազմի»,- ասաց նա` հավելելով, որ, ցավոք, ԼՂ հարցը փորձում են վերցնել են Հայաստանի ձեռքից:

Արա Պապյանին հակադարձեց ՀՀԿ խմբակցության պատգամավոր Շիրակ Թորոսյանը` ասելով, որ, ըստ պաշտոնական տեղեկատվության, Վիեննայում ու Սանկտ Պետրերբուրգում բանակցություններ տեղի չեն ունեցել, փորձ է արվել կողմերին բերել սեղանի շուրջ, որ ապահովվի  հրադադարը սահմանին: «Կազանյան փաստաթղթի մասին որևէ բան չկա: Վիեննայում ու Պետերբուրգում որևէ փաստաթուղթ չեն քննարկել»,- ասաց նա: