Բրյուսելից պրոֆեսորներ են ժամանել Հայաստան` Արցախյան պատերազմի մասին ուսումնասիրություններ անելու

Արցախյան պատերազմի, ապրիլյան իրադարձությունների, ինչպես նաև կամավորական շարժման մասին ուսումնասիրություններ իրականացնելու նպատակով Բրյուսելից Հայաստան են ժամանել քաղաքագետ պրոֆեսորներ՝ Հյուսիսային Կովկասի մասնագետ, Բրյուսելի ազատ համալսարանում դասավանդող Օդ Մեռլենն ու Հայաստանի և Ղարաբաղյան պատերազմի մասնագետ Թալին Փափազյանը:

Այսօր ՀՅԴ Գերագույն մարմնում պրոֆեսորները հանդիպեցին մի շարք ազատամարտիկների հետ, որոնք ներկայացրեցին Արցախյան ազատամարտին վերաբերող մանրամասն տեղեկություններ: Մեռլենն ու Փափազյանն իրենց հերթին հարցազրույցներ վերցրեցին ազատամարտիկներից, որոնք նրանց աշխատանքի հիմքը կհանդիսանան:

Yerkir.am-ի հարցին, թե ուսումնասիրությունների արդյունքն ի՞նչ տեսքով և ե՞րբ հասանելի կլինի, Փափազյանը պատասխանեց, որ դեռևս վաղ է ժամկետ նշել:

«Այս աշխատանքը, որ կտանինք, եվրոպական լայն ծրագիրի շատ փոքրիկ մը մաս կկազմե: Հոկտեմբերին ես և Օդը Բրյուսել պիտի երթանք և ներկայացնենք մեր հիմիկվա հետազոտություններու նախնական արդյունքները: Բայց մի քանի ամիս կամ անգամ մեկ տարի պիտի տևեն այս աշխատանքները, մինչև ամփոփենք և վերլուծենք: Արդյունքը պիտի ըլլա կա’մ հոդվածի, կա’մ ալ, եթե հաջողինք, գիրքի մը տեսքով»,- ասաց Փափազյանը:

Պրոֆեսորները Հայաստանում կլինեն դեռևս մեկ շաբաթ: Նրանք հանդիպումներ կունենան նաև այլ ազատամարտիկների հետ: