Հայ բոդիբիլդերները Վրաստանում 4 մեդալ են նվաճել

Վրաստանում տեղի ունեցած  Բոդիբիլդինգի և ֆիթնեսի միջազգային մրցաշարում հայ մարզիկները նվաճել են 4 մեդալ:  

Հայաստանի թիմը, որը մրցաշարին մասնակցում էր 5 մարզիկով, նվաճել է  1 ոսկե, 1 արծաթե և 2 բրոնզե մեդալ:  

 Հայաստանի ներկայացուցիչներից դասական բոդիբիլդինգում  ոսկե մեդալ է նվաճել Արթուր Հարությունյանը: Լողափային բոդիբիլդինգ ձևում արծաթե մեդալի է արժանացել  Գևորգ Թութունջյանը: Նույն մրցաձևում 3-րդ տեղն է գրավել Առաքել Ջեյրանյանը, իսկ բոդիբիլդինգում բրոնզե մեդալ է նվաճել Լևոն Հովհաննիսյանը: Վերջինս Yerkir.am-ի հետ զրույցում խոսեց տպավորությունների մասին:

«Մրցաշարը բարձր մակարդակով էր կազմակերպված:   Չէինք սպասում,  որ մասնակիցների թվում կլինեն նաև նման ուժեղագույն մարզիկներ,  բայց պարզվեց, որ մասնակիցների թվում կային նաև անվանի բոդիբիլդերներ: Այնումենայնիվ, մեր հավաքականը կարողացավ հիանալի ելույթներ ունենալ և բոլորից շատ մեդալներ նվաճել: Ցանկանում են նաև շնորհակալություն հայտնել ֆեդերացիայի նախագահ Գևորգ Հակոբյանին, ում շնորհիվ մենք  մրցաշարին մասնակցելու հնարավորություն ունեցանք»,- ասաց Հովհաննիսյանը:

Նշենք, որ մրցաշարին մասնակցում էր 7 երկրի շուրջ 30 մարզիկ, որոնց թվում կային նաև մի շարք տիտղոսակիր բոդիբիլդերներ: