Սեյրան Օհանյանը զեկուցեց Քարվաճառում տեղի ունեցածի մասին

Այսօր կառավարության նիստի սկզբում պաշտպանության նախարար Սեյրան Օհանյանը զեկուցեց Քարվաճառ ներթափանցած ադրբեջանական խմբի մասին:

Նա նշեց, որ 1994 թվականի զինադադարի կնքումից հետո Ադրբեջանի վարած քաղաքականության արդյունքում գործում են և' դիպուկահարներ, և' դիվերսիոն խմբեր, Ադրբեջանը պարբերաբար լարվածություն է ստեղծում Լեռնային Ղարաբաղի տարածքում, և վերջին ժամանակներս այդ լարվածությունը տեղափոխվել է Հայաստանի հյուսիսարևելյան շրջան` Տավուշի մարզ:

«Միշտ տեղեկություն է եղել, որ Քարվաճառում հնարավոր են նման ներթափանցումներ: Վերջին շրջանում որոշակի հետքեր կային: ՊՆ-ն  միջոցառումներ է ձեռնարկել` համագործակցելով ներքին գործերի և ազգային անվտանգության ծառայությունների հետ: Հայտնաբերվել են հետքերը և խմբի մեկ անդամ, որից հետո համապատասխան միջոցառումներ ձեռնարկվեցին հավելյալ անցակետերի և հավելյալ ստորաբաժանումների ուղղությամբ: Պաշտպանության բանակի և իրավապահ ստորաբաժանումների հետ միասին բացահայտվեցին խմբի բոլոր անդամները»,- ասաց Սեյրան Օհանյանը:

Նախարարի խոսքով` իրականացվում են միջոցառումներ հակառակորդի հնարավոր ներթափանցման ուղիները բացահայտելու և ականապատման միջոցառումներ իրականացնելու ուղղությամբ: «Իրականացվում են բոլոր համապատասխան միջոցառումները, որպեսզի բնակչության շրջանում վստահություն լինի, որ բանակն իր առջև դրվ ած խնդիրները լուծում է: Կարվի ամեն ինչ, որ հետագայում նման դեպքերը բացառվեն»,- ասաց Սեյրան Օհանյանը: