Մենք լացող կամ փախչող զինվոր չենք ունեցել. առաջնագիծ մեկնած բժիշկների տպավորությունները

Առաջնագծում վիրավոր զինծառայողներին օգնելիս ամեն կերպ փորձում էինք մեր զգացմունքները հաղթահարել, հույզերին չտրվել, որովհետև զինվորի կյանքն էր դրված սեղանին. yerkir.am-ի հետ զրույցում ասաց «Աստղիկ» բժշկական կենտրոնի ռեանիմատոլոգ Վլադիմիր Սարգսյանը:

Սարգսյանն առողջապահության նախարար Արմեն Մուրադյանի հրամանով ապրիլի 2-5-ը եղել է Ղարաբաղում` առաջնագծում, բուժօգնություն է ցուցաբերել վիրավոր զինծառայողներին:

Ի դեպ, Սարգսյանը ժամանակին ծառայել է հենց Ղարաբաղում: «Առհասարակ, ծառայած լինելը շատ էր օգնում այնքանով, որ ծառայության ժամանակ մենք արդեն անցել էինք այդ ամենի միջով, և հիմա ուղղակի մնում էր արագ կողմորոշվել ու ճիշտ քայլերի դիմել: Մարտական գործողությունների ժամանակ սահմանին առաջին անգամ էի որպես մասնագետ լինում: Զինվորի կյանքը շատ կարևոր է մեզ համար, յուրաքանչյուր զինվոր արժեք է մեզ համար: Փառք ու պատիվ յուրաքանչյուրին, որովհետև մենք այսօր ունենք 18 տարեկան զինվոր, որի մեջ այնքան հայրենասիրություն, կամք ու ուժ կա, որ թշնամու ոչ մի զենք էլ մեզ չի հաղթի: Մենք լացող կամ փախչող զինվոր չենք ունեցել»,- ասաց նա:

Բժիշկն այսօր արժանացավ պատվոգրի: Պարգևատրվեցին նաև ապրիլին ղարաբաղա-ադրբեջանական սահմանագծում տեղի ունեցած իրադարձությունների ժամանակ մասնագիտական պարտքը կատարած բժիշկները, Հայրենական մեծ պատերազմի բժիշկ-վետերանները, ինչպես նաև մարտական գործողությունների ժամանակ խիզախությամբ աչքի ընկած զինծառայողները:

Հայաստանի երիտասարդական հիմնադրամի հոգաբարձուների խորհրդի համակարգող Կարեն Ավագյանը նշեց, որ միջոցառումը նվիրված է հաղթանակների օրվան, և ամեն տարի այս օրը ՀՀԿ երիտասասարդական կազմակերպությունն ու «Առողջապահության կազմակերպիչների միավորում» ՀԿ-ն համատեղ ծրագրեր են իրականացնում:

«Մենք հաղթանակների տոնին նվիրված միջոցառումներում առանձնացնում ենք և' Հայրենական մեծ պատերազմի հաղթանակը` մեր պապերի ձեռքբերումները, և' Ղարաբաղյան պատերազմը` մեր հայրերի և եղբայրների ձեռքբերումները: Այդ ձեռքբերումների մեջ առանձնացնում ենք բժիշկների դերը, նշանակությունը: Այսօր մենք պարգևատրելու ենք ոչ միայն Հայրենական պատերազմի վետերան-բժիշկներին, այլ նաև նրանց, ովքեր վերջին օրերին իրենց մասնագիտական ողջ հմտությունները ներդրեցին առաջին գծում»,- ասաց Ավագյանը:

Ըստ նրա` այս օրերին առաջնագծում այնպիսի առողջապահական միջոցառումներ իրականացվեցին, որ շատ ու շատ զարգացած երկրներում անհասկանալի էին` խրամատում վիրահատություններ, բժշկական այնպիսի միջամտություններ, որոնց շնորհիվ շատ զինվորների կյանքեր են փրկվել:

Ավագյանը տեղեկացրեց նաև, որ պարգևատրման ներկայացված չեն ռազմական բժիշկները, քանի որ առաջիկայում ԼՂ-ում տեղի կունենա հատուկ միջոցառում, որտեղ էլ կպարգևատրեն նրանց:

ՀՀ առողջապահության նախարար Արմեն Մուրադյանն էլ նշեց, որ մայիս ամիսը հայ ժողովրդի պատմության մեջ միշտ եղել է առանձնահատուկ` իր հաղթանակներով, իր հույսով, այն արժանապատվությամբ լի ամիս է:

«Մայիսը Սարդարապատի հաղթանակի, Շուշիի ազատագրման, Պաշտպանության բանակի կազմավորման ամիսն է: Մայիսն այսօր էլ ոգեշնչում է մեզ` որպես մեծ հաղթանակների ամիս: Ես գլուխ եմ խոնարհում մեր նահատակված զինվորների առջև, վիրավորներին ապաքինում եմ ցանկանում: Նրանց աչքերում այս օրերին տեսել եմ միայն մեկ ցանկություն` արագ վերադառնալ շարք, արագ վերադառնալ խրամատ և անառիկ պահել հայրենիքի սահմանները, մեր երեխաների անդորրն ու մեր արժանապատվությունը: Ես շնորհակալություն եմ հայտնում մեր բժիշկներին, որոնք այս օրերին զինվոր են դարձել: Մենք անհաղթելի ենք»,- ասաց նախարարը:

«Աստղիկ» բժշկական կենտրոնի անեսթեզիոլոգ-ռեանիմատոլոգ  Լուսինե Մկրտումյանը, ով նույնպես պատվոգրի էր արժանացել առաջնագծում նվիրաբար իր աշխատանքը կատարելու համար, ասաց. «Մեր բոլոր զինվորները հերոսներ են: Գիտե՞ք` վիրավոր զինվորները տանը ոչ մեկին չէին ասում, որ վիրավորվել են: Բացի այդ` տղաները, իմանալով, որ վիրավոր էին, իմանալով, որ կարող էին մահանալ, եթե վիրավոր շարունակեին կռվել, միևնույն է, կռվում էին, մինչև վերջ պայքարում: Մարտակերտի հոսպիտալում էլ բոլորն ասում էին` այնպես արեք, արագ լավանանք, որ առաջնագիծ գնանք` մեր ընկերներն այնտեղ են: Ոչ ոք չէր ասում, որ ցավում են վերքերը, թեև ես լավ գիտեմ` ինչ ցավեր են ունենում, բայց, մեկ է, պնդում էին, թե չի ցավում: Նման զինվորներ ունենք` առաջնագծում կանգնած»:

Պարգևատրված զինծառայող, շարքային Բենիկ Եղիազարյանը որովայնի շրջանում է բեկորային վիրավորում ստացել, մեկ անգամ Ղարաբաղում են վիրահատել, հետո տեղափոխել են Երևան և կրկին վիրահատել: «Երկու վիրահատություն եմ տարել` որովայնի և ձախ ձեռքի շրջանում: Ապրիլի 5-ն էր, մարտական դիրքերում էինք, և սննդի մեքենան մոտեցավ, որ սնունդ ստանանք: Հակառակորդը նկատել էր մեքենան և միանգամից կրակ բացեց մեքենայի ուղղությամբ: Շնորհակալ եմ, իրոք, բժիշկներին, որոնք այս օրերին ասես մեր մայրերն ու քույրերը դարձած լինեին»,- ասաց նա:

Պատվոգրի արժանացած կրտսեր սերժանտ Միքայել Սահակյանը Գյումրիից է, ծառայության է անցել ԼՂ-ում: Ապրիլի 4-ին մարտական գործողությունների ժամանակ էլ վիրավորվել է: «Կրծքավանդակի հատվածում ստացել եմ բեկորային վնասվածք, բեկորը ծակել էր թոքս, բայց հիմա արդեն ապաքինվում եմ շնորհիվ մեր բժիշկների: Դիրքերում կատարում էինք շրջանաձև պաշտպանություն, երբ հակառակորդը սկսեց կրակել մեզ վրա: Հետո արդեն արկ պայթեց, բայց, բարեբախտաբար, միայն ես վիրավորվեցի»,- ասաց նա` հավելելով, որ ապաքինվելուն պես պետք է շտապի առաջնագիծ, քանի որ դեռ 1 տարի 7 ամիս ունի ծառայելու: