Իրաքը տեղեկացրել է Սիրիայից փախչող ԻՊ ահաբեկիչների ձերբակալման մասին

Իրաքի պաշտպանության նախարարը հայտարարություն է տարածել, որի համաձայն՝  իրենք ձերբակալել են «Իսլամական պետության» մի քանի ահաբեկիչների, որոնք Սիրիայից փախել են Իրաք. հայտնում է ՌԻԱ «Նովոստի»-ն:

«Սիրիայից փախած՝ «Իսլամական պետության» մի քանի զինյալներ ձերբակալվել են Իրաքի տարածքում»,- մանրամասնել են գերատեսչությունից:

Այս պահի դրությամբ ձերբակալության վերաբերյալ այլ մանրամասներ իրաքյան կողմը դեռ չի հաղորդում:

Չորեքշաբթի նախարար Նաջահ  աշ Շամրին ծանոթացել է Սիրիայի և Իրաքի սահմանին տիրող իրավիճակին և շեշտել, որ սահմանն ապօրինաբար հատողները շարունակելու են հետապնդվել, իսկ նման դեպքերի կասեցման նպատակով սահմանի հսկողությունն ավելի է ուժեղացվել:

Հիշեցնենք, որ ավելի վաղ Սիրիայի քրդական ինքնավարությունը տեղեկացրել էր, որ 785 օտարերկրացի, որոնք առնչություն ունեն «Իսլամական պետության» հետ, Թուրքիայի գործողությունների արդյունքում փախել են բանտից:

Հակամարտության ֆոնին՝ Թուրքիան քրդերին է մեղադրում նրանց դիտավորյալ ազատ արձակելու մեջ: