Դավութօղլուն ընկել է ռոմանտիկայի գիրկը

Թուրքիայի վարչապետ Ահմեդ Դավութօղլուն այսօր հանդիպում է ունեցել իշխող «Արդարություն և զարգացում» կուսակցության երիտասարդական թևի ներկայացուցիչների հետ և ընկել ռոմանտիկայի գիրկը:

Պարզվում է՝ նպատակներին հասնելու համար անհրաժեշտ էներգիան իրենք ստանում են ժողովրդից:

«Մեր էներգիայի աղբյուրը մեր ժողովուրդն է: Մենք հատիկ առ հատիկ «ասեղնագործում ենք» ժողովրդի միասնականությունը»,- ասել է Թուրքիայի վարչապետը:

Այնուհետև Դավութօղլուն որոշել է անդրադառնալ տարեցների և կանանց իրավունքներին՝ հորդորելով երբեք չդադարել հարգել նրանց: «Ես ցանկանում եմ կոչ անել իմ երիտասարդ եղբայրներին` նա, ով կհանդգնի բռնություն կիրառել տարեցների կամ կանանց նկատմամբ, ամենավճռական ձևով նրանց դեմն առեք»,- նշել է Դավութօղլուն, ով, վստահաբար, քաջատեղյակ է Թուրքիայում սիրիացի փախստականների, հատկապես՝ փախստական երեխաների նկատմամբ կիրառված բռնություններից:

Ելույթի վերջում` ընդդիմությանը մի քանի «քաղցր խոսք» ասելուց հետո, Դավութօղլուն անդրադարձել է նաև ահաբեչություններին` նշելով, թե իբր Թուրքիան ամենաբուռն պայքարն է մղում դրա դեմ: