Լույսերը հանգցնելը, ընտրատեղամասերի մոտ աղմուկներն անցել են պատմության գիրկը. Հերմինե Նաղդալյան

ԱԺ փոխխոսնակ Հերմինե Նաղդալյանն այսօր խորհրդարանում լրագրողների հետ զրույցում անդրադարձավ դեկտեմբերի վեցին տեղի ունեցած հանրաքվեին: Նրա խոսքով` ընտրակեղծիքների և խախտումների մասին խոսակցությունները պետք է լինեն հստակ և առարկայական, փաստային:

«Այն իներցիոն խոսակցությունը, սպասելիքները կամ պատրանքները, որ որոշ քաղաքական ուժեր կարող էին ունենալ, և որ կան մեր հիշողության մեջ, դա ընդհանուր խոսակցություն է, որը ոչինչ չի ասում: Իսկ կոնկրետ խոսակցությունն այն է, ինչ այսօր ընթանում է Կենտրոնական ընտրական հանձնաժողովում, որտեղ հավաքված են բոլոր բողոքները և կատարվում է աշխատանք», – ընդգծեց նա:

Անդրադառնալով մի քանի ընտրատարածքում արված վերահաշվարկներին` Նաղդալյանը նշեց, որ դրանք էական փոփոխությունների չեն հանգեցրել: Նրա խոսքով` նախկինում եղած ընտրությունների հետ համեմատականներ անցկացնելով` այս անգամ մասսայական խախտման դեպքեր չեն եղել: Նաղդալյանն ընդգծեց, որ իրենք որևէ մեկին համոզելու խնդիր չունեն:

«Քայլ առ քայլ ընտրությունները մեր երկրում կատարվում են ավելի թափանցիկ և ավելի օրինական: Տարիների ընթացքում այն խախտումների տեսակները, որոնք եղել են 10-15 տարի առաջ, այսօր բացարձակ անցել են պատմության գիրկը, օրինակ` լույսերը հանգցրելը, տուփերը գողանալը, ընտրատեղամասերի մոտ աղմուկները: Դուք ասում եք` լցոնում եք արել, որը փաստ չէ: Փաստն այն է, որն արձանագրվել է», – հավելեց նա և ընդգծեց.

«Տեղամասերի դիմաց հանգիստ, բացարձակ անխոչընդոտ էր: Այսօր դեռ կան դեպքեր, որոնց մասին դուք խոսում եք: Դուք էլ շատ լավ գիտեք` անմիջապես բարձրաձայնվեց փաստը, և կալանավորվեց կատարողը, դա է քաղաքական կամքը», -եզրափակեց նա: