Համապատասխանո՞ւմ է Ս. Կիրակոս հայկական եկեղեցու պետականացումը Լոզանի պայմանագրին. Կարո Փայլանը՝ Դավութօղլուին

Թուրքիայի մեջլիսի հայ պատգամավոր Կարո Փայլանը մեջլիսի օրակարգ է բերել Տիգրանակերտի Սուրբ Կիրակոս հայկական եկեղեցին շտապ պետականացնելու խնդիրը:

Ըստ Demokrathaber-ի՝ Փայլանն այդ մասին գրավոր հարցերն ուղղել է վարչապետ Ահմեդ Դավութօղլուին: Նա, մասնավորապես, պահանջել է պատասխանել հետևյալ հարցերին`

1. Ի՞նչ հիմնավորում ունի Տիգրանակերտի Սուր շրջանի վերաբերյալ ընդունված «հապճեպ պետականացման» որոշումը:

2. Ի՞նչ է տեղի ունենալու պետականացման ենթակա տարածքների հետ:

3. Ինչպե՞ս է պաշտպանվելու Սուր շրջանում բնակվող քաղաքացիների սեփականության իրավունքը:

4. Արդյո՞ք ճիշտ է այն լուրը, որ պետականացման ենթակա տարածքներից են նաև հայկական և ասորական հիմնադրամներին պատկանող և անգնահատելի հոգևոր արժեք ունեցող` Միջին Արևելքի ամենամեծ հայկական եկեղեցին՝ Սուրբ Կիրակոսը, Սուրբ Սարգիս եկեղեցին, Մար Պետյուն քաղդեական եկեղեցին, ասորական Մարիամ Աստվածածին և Բողոքական եկեղեցին:

5. Այն կառույցները, որոնց վերաբերյալ պետականացման որոշում է կայացվել, ի՞նչ չափանիշներով են դասվել կառավարության որոշման մեջ նշված  «ռիսկային տարածքների» շարքը:

6. Արդյո՞ք հասարակությանը ներկայացվելու են այն փաստաթղթերն ու հաշվետվությունները, որոնց համաձայն` վերոնշյալ եկեղեցիները դասվել են «ռիսկային տարածքների» շարքը:

7. Ի՞նչ է լինելու այդ եկեղեցիների պետականացման արդյունքում: Այսուհետ ի՞նչ նպատակի են ծառայելու այդ կառույցները:

8. Արդյո՞ք կարծում եք, որ փոքրամասնությունների հիմնադրամներին պատկանող եկեղեցիների և անշարժ գույքի պետականացումը համապատասխանում է ներքին օրենսդրությանն ու Լոզանի պայմանագրին:

9. Որպես կառավարություն, որը պարտավորվել էր վերադարձնել փոքրամասնություններին պատկանող ամբողջ գույքը, չե՞ք կարծում, որ այս քայլը հակասում է ձեր նախկին քաղաքականությանը: