Մալաթիայի տոնավաճառի աշխատակիցների խնդիրը դեռ լուծված չէ

Այսօր Մալաթիայի տոնավաճառի աշխատակիցները դուրս էին եկել բողոքի ցույցի: Նրանք պահանջում էին նվազեցնել տաղավարների վարձավճարները, որովհետև առևտրի ծավալները խիստ նվազել են, և իրենք չեն կարողանում անգամ տաղավարների վարձավճարները մուծել:

Խնդիրը դեռևս լուծված չէ, Մալաթիայի տոնավաճառի տնօրինությունը միայն մի պայմանով է պատրաստ նվազեցնել վարձավճարները, եթե աշխատակիցներն իրենց հաշվին իրականացնեն հարկային պարտավորությունները: Պայմանն ընդունելի չէ աշխատակիցների համար:

Բողոքի ակցիայի մասնակիցները փակել էին փողոցի երթևեկելի մասը, պահանջում էին երթուղայինների վարորդներից` կանգնեցնել մեքենաները: Նշենք, որ փողոցը փակելու հետևանքով  ընդհարում է եղել նաև վարորդների ու բողոքողների միջև: Վարորդները պահանջել են բացել փողոցը և չխոչընդոտել երթևեկությանը: Տոնավաճառի աշխատակիցներն էլ արձագանքել են, թե երբ տաքսու վարորդներն էին բողոքում, նրանց բողոքին ոչ ոք չէր խանգարում:

Պարբերաբար  ընդհարումներ են եղել նաև ոստիկանների հետ: