Ուռճացված կոմունալ վարձավճարների բողոքի մասին էներգետիկայի նախարարությունը տեղյակ է

Այսօր կառավարության նիստից հետո լրագրողները էներգետիկայի և բնական պաշարների նախարար Երվանդ Զախարյանից հետաքրքրվեցին բնակիչների բազմաթիվ ահազանգերի ու համատարած բողոքի մասին, որ կոմունալ վարձավճարները անտրամաբանական են, որ էլեկտրաէներգիայի հունվար ամսվա վճարները կրկնակի են:

Նախարարը նշեց, որ իրենք ևս բնակիչներից ստացել են դիմում-բողոքներ, որ էլեկտրաէներգայի վճարները ուռճացվում են: «Մենք էլ ենք ստացել նման դիմումներ: Հանձնարարված է ուսումնասիրել` էլցանցի հետ, հավանաբար, պատասխան կտրվի և՛ «Հայաստանի էլեկտրական ցանցեր» ընկերության կողմից, և՛ մեր կողմից: Ինձ չի թվում, որ նման բաներ կան»,- ասաց Զախարյանը:

Հարցին, թե ո՞ւմ կարող են դիմել քաղաքացիներն իրենց իրավունքների պաշտպանության համար, նախարարը պատասխանեց, որ ոչ ոքի պետք չէ դիմել, քանի որ իրենց դիմող քաղաքացիները կստանան պատասխան: