ՄԱԿ-ը Էրդողանին բացատրել է, թե ինքն ինչ գործի է ծառայում

Երեկ Թուրքիայի նախագահ Ռեջեփ Թայիփ Էրդողանը ամոթանք էր տվել ՄԱԿ-ին՝ կազմակերպությանը մեղադրելով սիրիացի փախստականների հարցում Թուրքիային չօգնելու մեջ: «Կներեք՝ մեր ճակատին «հարիֆ» գրված չէ: Է՜յ, ՄԱ\'Կ, դու ի՞նչ գործի ես ծառայում։ Քո պարտականությունը ո՞րն է։ Թուրքիան 10 միլիարդ դոլար է ծախսել երկրում գտնվող փախստականների համար, իսկ ՄԱԿ-ը Թուրքիային 455 միլիոն դոլար է հատկացրել։ Ամոթ է, ամոթ»,- ասել էր նա:

Ըստ Demokrathaber-ի՝  ՄԱԿ-ի գլխավոր քարտուղարի խոսնակ Սթեֆան Դուժարին պատասխանել է Թուրքիայի նախագահ Ռեջեփ Էրդողանին՝ նշելով, որ նրա խոսքերը, հավանաբար, մեկ հոգու ուղղված չեն եղել, այլ բոլորին:

«ՄԱԿ-ը սիրիացիներին մարդասիրական օգնությամբ է աջակցում: Սա բացահայտ փաստ է, և մենք շարունակելու ենք այդ աջակցությունը: Ինչպես նախկինում եմ ասել՝ մենք երախտագիտությամբ ենք ընդունում Թուրքիայի՝ սիրիացի փախստականներին ցուցաբերած օգնությունը»,- ասել է նա:

Հիշեցնենք, որ ՄԱԿ-ը սիրիացի փախստականների առաջ սահմանը բացելու կոչ էր արել Թուրքիային: