Շաբոյանը բացատրեց, թե ինչու բենզինի գինն էապես չի նվազում

Այսօր լրագրողների հետ զրույցում ՏՄՊՊՀ նախագահ Արտակ Շաբոյանն անդրադարձավ Հայաստանում բենզինի գնին: Նա նախ նշեց, որ բենզինի գնի հարցը գտնվում է ՏՄՊՊՀ ուշադրության կենտրոնում, այնուհետև հավելել է, որ անցած տարվա ընթացքում բենզինի գինը 470 դրամից նվազել մինչև 410 դրամ, այսինքն` մոտ 13 տոկսով բենզինի գինը նվազել է:

«Համաձայն մեր ուսումնասիրության արդյունքների` Հայաստանում վաճառվող բենզինի մեջ նավթի տեսակարար կշիռը կազմում է մոտավորապես 7 տոկոս: Մենք ներկրում ենք Ռուսաստանից, և Ռուսաստանում նավթի տեսակարար կշիռը բավականին փոքր է, պայմանավորված այն հանգամանքով, որ արդյունահանման ժամանակ մեծ ծախսեր են կատարվում, բացի դրանից` Ռուսաստանում բենզինը մեծ չափի հարկերով է հարկվում: Ավելին` երբ ներմուծվում է Հայաստան, այստեղ ևս բենզինը մեծ չափով հարկվում է, և այդ պատճառով էլ 7 կամ 8 տոկոս է կազմում նավթի տեսակար կշիռը: Այդ պատճառով էլ նավթի գների նվազումը մեծ չափով իր ազդեցությունը չի թողնում բենզինի գների վրա»,- ասաց ՏՄՊՊՀ նախագահը:

Դիտարկմանը, թե, փաստորեն, բենզինի գները չեն իջնում կառավարության վարած քաղաքականության արդյունքում, Շաբոյանը չհամաձայնեց` ասելով, թե ինքն այդպես չի կարծում: «Եթե մենք համեմատություն ենք իրականցնում, ապա ԱՄՆ-ում հարկերը բավականին ցածր տեսակարար կշիռ ունեն, տարբեր երկրներում տեսակարար կշիռները տարբեր են, բայց քանի որ մենք ներմուծում ենք Ռուսաստանից և մեր հարկային քաղաքականության հետևանքով հարկերի կշիռը մեծ է, այդ պատճառով նավթի գների փոփոխությունը շատ մեծ ազդեցություն չունի»,- ասաց նա: