ԱԺ-ում քննարկում են անչափահասների`շահումով խաղերով և մոլախաղերով հրապուրվելու կանխարգելման մեխանիզմները

Այսօր, ի թիվս այլ օրենքների նախագծերի, խորհրդարանում քննարկվում է Կառավարության կողմից ներկայացված «Շահումով խաղերի և խաղատների մասին» և «Գովազդի մասին» ՀՀ օրենքներում փոփոխություններ և լրացումներ կատարելու մասին նախագծերի փաթեթը: Ֆինանսների նախարարի տեղակալ Վախթանգ Միրումյանը նշեց, որ այս փոփոխությունների նպատակը մեկն է՝ արգելել ինտերնետ շահումով խաղերի գովազդը հեռուստատեսությամբ, ռադիոյով և տարածման այլ միջոցներով:

«Այս փոփոխությունները նպատակ ունեն միասնական մոտեցում ցուցաբերել ինչպես ինտերնետ շահումով խաղերի գովազդի, այնպես էլ խաղատների կամ շահումով խաղերի գովազդի մասով և սահմանել, որ այնպես, ինչպես շահումով խաղերի դեպքում է գովազդ արգելվում, այս դեպքում էլ գովազդն արգելված է»,-ընդգծեց Միրումյանը:

Նրա խոսքով` գովազդ թույլատրվելու է այն դեպքում, երբ որ ինտերնետ շահումով խաղի կազմակերպման գովազդը կատարվում է համապատասխան խաղասրահի միջոցով, որոնք տեղադրվում են կամ ՀՀ սահմանային մաքսային կետերում, կամ էլ առնվազն չորս աստղանի հյուրանոցային համալիրներում:

«Միատեսակ մոտեցում ցուցաբերելով՝ այս նախագծի ընդունումը նաև նպատակ ունի մեր քաղաքացիներին, հատկապես` անչափահասներին հեռու պահել և կանխարգելել շահումով խաղերով և մոլախաղերով հրապուրվելուց»,-ասաց նա: