Ինտերնետային շահումով խաղերի ոլորտում վերահսկողությունը կուժեղացվի

Կառավարությունն այսօր հավանության արժանացրեց «Շահումով խաղերի և խաղատների մասին» Հայաստանի Հանրապետության օրենքում լրացումներ և փոփոխություն կատարելու մասին», «Գովազդի մասին» Հայաստանի Հանրապետության օրենքում լրացումներ կատարելու մասին» և «Լիցենզավորման մասին» Հայաստանի Հանրապետության օրենքում փոփոխություն կատարելու մասին» Հայաստանի Հանրապետության օրենքների նախագծերի փաթեթին:

ՀՀ ֆինանսների փոխնախարար Վախթանգ Միրումյանը նշեց, որ նախատեսված փոփոխություններից մեկը վերաբերում է ինտերնետային շահումով խաղերի գովազդին:

Փոխնախախարի բնորոշմամբ՝ ըստ էության, ինտերնետ շահումով խաղերը նույնպես շահումով խաղեր են՝ համաձայն «Շահումով խաղերի և խաղատների մասին» օրենքի, սակայն գովազդի արգելքը, ի տարբերություն շահումով խաղերի մյուս տեսակների, ինտերնետ շահումով խաղերի վրա չի տարածվում: Նախագծով առաջարկվում է այդ սահմանափակումը տարածել նաև այս տեսակի գովազդի վրա, որի նպատակն է կանխարգելել մեր քաղաքացիների` շահումով խաղերով հրապուրվելու հնարավորությունները:

Երկրորդ փոփոխությունն ինտերնետային շահումով խաղերի պարզ լիցենզավորման գործընթացը բարդացնելու մասին է: «Առաջարկը բխում է ՀՀ-ի ստանձնած միջազգային պարտավորություններից: Ինտերնետային շահումով խաղերը ևս համարվում են բարձր ռիսկային ոլորտ և անհրաժեշտ է, որ բարդ ընթացակարգով լիցենզավորում իրականացվի, ինչպես նաև այդ ուղղությամբ վերահսկողություն իրականացվի»,- ասաց Վախթանգ Միրումյանը: