Կրթության ոլորտում գումարները միշտ քիչ են. Աշոտյանի մտահոգությունները

ԿԳ նախարար Արմեն Աշոտյանն այսօր խորհրդարանում 2016 թվականի բյուջեի քննարկման ժամանակ ներկայացրեց եկող տարի կրթության ոլորտին հատկացվելիք գումարների տեղաբաշխումները: Նախարարը նշեց, որ հաջորդ տարվա համար կրթության ոլորտի հատկացումները, նոմինալ առումով, ավելի մեծ են, քան ընթացիկ տարվա բյուջեի հատկացումները:

Աշոտյանի խոսքով` հաջորդ տարվա համար հանրակրթության ոլորտին հատկացումներ կատարելու համար նախատեսված են ավելի շատ գումարներ`ելնելով այն ուրախալի փաստից, որ հաջորդ տարվանից մեզ մոտ ավելանալու է աշակերտների թիվը: Նախարարը նշեց, որ նշված ոլորտի հատկացումները 366 հազար աշակերտների ուսումնառության ապահովման համար են. աշակերտների թիվը 13 հազարով ավելի է, քան ընթացիկ տարի:

Ըստ նրա` այդ հատկացումներից զգալի գումար է տրամադրվելու 1990-ական թվականներից անմխիթար վիճակում գտնվող նախադպրոցական հաստատությունների վերակառուցման ու գործարկման համար: «Փորձում ենք վերականգնել նախադպրոցական կրթության հասանելությունը»,- ասաց Աշոտյանը` հավելելով. «Ավելանալու են նաև կրթության առանձնահատուկ պայմանների անհրաժեշտություն ունեցողների հատկացումները: Դա, մասնավորապես, վերաբերում է ներառական կրթություն իրականացնելու հատկացումներին: Խոսքը 5000 աշակերտների մասին է, իսկ ընթացիկ տարում եղել է 3500 աշակերտ: Սա նշանակում է, որ եկող տարի Հայաստանում կավելանա ներառական կրթություն իրականացնող դպրոցների և աշակերտների թիվը»:

Հաջորդ տարվա բյուջեով նախատեսվում է ավելի շատ ֆինանսական հատկացումներ կատարել նաև բարձրագույն կրթության ոլորտին` 800 միլիոն դրամ:

Թեև նախարարն, ընդհանուր առմամբ, գոհ էր իր ղեկավարած գերատեսչության բյուջետային հատկացումներից, սակայն չթաքցրեց նաև իր մտահոգությունները. «Ոչ մի երկրի կրթության ու գիտության ոլորտին հատկացվելիք գումարները բավական չեն`ազգի և ժողովրդի ամբիցիաները բավարարելու համար, կրթության ոլորտում գումարները միշտ քիչ են: Խոսքը բոլոր երկրների մասին է»:

Աշոտյանը նշեց նաև, որ ցանկալի կլինի, որ Տավուշի մարզի մի շարք համայնքների դպրոցահասակ երեխաների սննդի ապահովման համար արվեն ֆինանսական հատկացումներ, որոնք, ըստ իրենց նախնական հաշվարկների, կկազմեն 50 միլիոն դրամ: