23 զոհ, 707,1 մլն դրամի վնաս. տարին աննախադեպ է եղել հրդեհների քանակով և ծավալով

2015-ն աննախադեպ է եղել հրդեհների քանակով և ծավալով: Այսօր ՏԿԱԻՆ ճգնաժամային կառավարման ազգային կենտրոնի պետ Հովհաննես Խանգալդյանը լրագրողներին հայտնեց, որ 9 ամիսների ընթացքում խոտածածկ տարածքներում 4134 հրդեհ է բռնկվել, ինչը 2,5 անգամ ավելի է, քան նախորդ տարի: Սակայն, տխուր պատկերին զուգահեռ, նվազել է անտառային հրդեհների թիվը` այս տարի անտառային հրդեհի 10 դեպք է արձանագրվել` նախորդ տարվա 17-ի փոխարեն:

«Այս տարի հրդեհների պատճառով 707,1 մլն դրամի վնաս է պատճառվել, որը 405 միլիոնով ավելի է, քան 2013-2014թթ.: Հրդեհների հետևանքով մահացածների և տուժողների թիվն էլ է ավելացել. տարին դեռ չի փակվել, բայց արդեն 23 զոհ ու 31 տուժած ունենք»,-ասաց Խանգալդյանը:

Նա նշեց նաև, որ հրդեհների մարումը դժվար աշխատանք է Հայաստանում, քանի որ մեր անտառները բարձրադիր գոտիներում են, և այնտեղ տրանսպորտային միջոցի բարձրանալը գրեթե անհնար է լինում: