Տիգրան Սարգսյանի նշանակումն անվիճելի էր. Շավարշ Քոչարյան

ԵՏՄ կոլեգիայի նախագահի պաշտոնում Հայաստանի նախկին վարչապետ Տիգրան Սարգսյանի նշանակումն անվիճելի էր բոլոր անդամ պետությունների համար. կառավարության նիստից հետո լրագրողներին ասաց ՀՀ արտաքին գործերի փոխնախարար Շավարշ Քոչարյանը:

«Նախագահի տեղը պատկանում է Հայաստանին՝ համաձայն Եվրասիական տնտեսական միության մասին համաձայնագրի: Ըստ այդ համաձայնագրի՝ պետք է հերթով` այբբենական ցանկով և չորս տարի ժամկետով ղեկավարվի պետությունների ներկայացուցիչների կողմից»,- նշեց փոխարտգործնախարարը և հավելեց, որ կոլեգիայի նախկին անդամները որոշակի պաշտոնավարման ժամկետ ունեին, որը համաձայնագրով նախատեսված էր, և մինչև փետրվար այդ լիազորություններն ավարտվելու են:

«Երկու հարց կար՝ առաջինը` արդյո՞ք պետությունները շարունակելու են  երեքական ներկայացուցիչ ունենալ: Որոշում կայացվեց, որ պետք է երկու անդամ լինի: Երկրորդ հարցը նոր ղեկավարին էր վերաբերում, և Հայաստանի թեկնածությունը հաստատվեց»,- ասաց նա:

Հիշեցնենք, որ ՀՀ նախկին վարչապետ Տիգրան Սարգսյանը նախորդ տարի նշանակվել էր ԱՄՆ-ում ՀՀ արտակարգ և լիազոր դեսպան: