ՌԴ իշխանություններն անընդունելի են համարում OPT-ի հաղորդումը. Շավարշ Քոչարյան

Ի՞նչ է Հայաստանն անելու Վիլնյուսում. ԱԺ-ում 2014 թ. բյուջեի քննարկումների ժամանակ հետաքրքրվեց Նիկոլ Փաշինյանը ԱԳ փոխնախարար Շավարշ Քոչարյանից:

Փոխնախարարը նշեց, որ սեպտեմբերի 3-ի հայտարարությունից հետո, որով ցանկանում ենք անդամ դառնալ Մաքսային միությանը, այլևս հնարավոր չէ ստորագրել ԵՄ ազատ առևտրի համաձայնագիրը: Սակայն Հայաստանի դիրքորոշումն է` շարունակել բանակցությունները ԵՄ-ի հետ` հաշվի առնելով Հայաստանի` Մաքսային միությանն անդամագրվելու հայտը: 

«Այդ ուղղությամբ կոնկրետ պատասխան չեմ կարող տալ ձեզ, քանի որ գնում են բանակցություններ»,- ասաց փոխարտգործնախարարը:

Նա անդրադարձավ նաեւ Ռուսաստանի Առաջին ալիքի սկանդալային հեռուստառեպորտաժին: «Այո, OPT-ի հաղորդումը խայտառակ էր, Ռուսաստանի իշխանություններն անընդունելի են համարում այդ հաղորդման հեռարձակումը»,- վստահեցրեց Քոչարյանը:

Նիկոլ Փաշինյանը հետաքրքրվեց, թե որտե՞ղ կարող ենք ծանոթանալ ռուսական իշխանությունների արձագանքին: Շավարշ Քոչարյանը պատասխանեց, որ ԱԳՆ խողովակով է դա ճշտվել, ՌԴ ԱԳՆ-ն հայտնել է իր պաշտոնական դիրքորոշումը, որ իրենց համար դա անընդունելի է: