ԱԱԾ կեղծ աշխատակիցը հափշտակել է 35 հազար դոլար

ՀՀ Սյունիքի մարզի Քաջարան քաղաքի բնակիչ, 1988 թվականին ծնված Լևոն Վալենտինի Դանիելյանը, իր անձը կարևորելու և վստահություն ներշնչելու համար շրջապատում ներկայանալով որպես Հայաստանի Հանրապետության ազգային անվտանգության ծառայության աշխատակից, Գորիս քաղաքի երկու բնակիչներից՝  շուկայականից անհամեմատ էժան գներով ավտոմեքենաներ նրան վաճառելու, իսկ մեկ այլ բնակչից՝ դստերը բարձրագույն ուսումնական հաստատություն ընդունելու հարցում օգնություն ցուցաբերելու պատրվակներով, խաբեությամբ պահանջել և ստացել է 35.000 ԱՄՆ դոլար գումար։

 Ինչպես տեղեկացնում է ՀՀ ԱԱԾ մամուլի կենտրոնից, դեպքի  առթիվ հարուցված քրեական գործով Լևոն Դանիելյանին մեղադրանք է առաջադրվել խարդախությամբ՝ վստահությունը չարաշահելու եղանակով, առանձնապես խոշոր չափերով 16.527.700 ՀՀ դրամին համարժեք 35.000 ԱՄՆ դոլար հափշտակելու համար, նախատեսված ՀՀ քրեական օրենսգրքի 178-րդ հոդվածի 3-րդ մասի 1-ին կետի հատկանիշներով։

 Նախաքննությունն իրականացվում է ՀՀ ԱԱԾ քննչական վարչությունում,  Լևոն Դանիելյանը կալանավորված է։ Նրա գործողությունների հետևանքով տուժած քաղաքացիները կարող են դիմել  ԱԱԾ քննչական վարչությանը՝ 010 57-93-16 և 010 56-35-15 հեռախոսահամարներով։