Սրտանոթային հիվանդությունները երիտասարդացել են. 25-30 տարեկանների մոտ էլ է սրտամկանի ինֆարկտ լինում

Գաղտնիք չէ, որ աշնանը սրտանոթային հիվանդությունները սրվում են: Այսօր «Դիագնոստիկա» բժշկական կենտրոնի սրտաբանական կլինիկայի ղեկավար, բժշկական գիտությունների թեկնածու Մարինա Օրդյանը լրագրողների հետ զրույցում նշեց, որ այս եղանակին սրտանոթային հիվանդությունների ակտիվացման գլխավոր պատճառը եղանակն է` առաջին հերթին ջերմաստիճանի նվազումը:

Ըստ նրա` խոնավության բարձրացումը, գեոմագնիսական դաշտի տատանումները նույնպես ազդում են սրտանոթային համակարգի վրա: «Այս եղանակին անգամ առողջ մարդիկ կարող են սրտանոթային խնդիրներ ունենալ, իսկ արդեն իսկ ունեցողներին խորհուրդ կտամ անպայման դիմել իրենց բժշկին, որպեսզի դեղերի քանակը, գուցե անհրաժեշտության դեպքում, ավելացվի: Խոնավ, ամպամած եղանակին օդի աղտոտվածությունն ավելանում է, ինչն էլ, իր հերթին, ազդում է սրտանոթային համակարգի վրա: Մի խոսքով` եղանակն ամեն կերպ «նպաստավոր» պայմաններ է ստեղծում, իսկ մեզ մնում է հետևել առողջությանը»,- ասաց Օրդյանը:

Ըստ սրտաբանի` քանի որ կլիմայի վրա ազդել չենք կարող, փոխարենը կարող ենք պատրաստվել դրան դիմակայելուն: Օրդյանը խորհուրդ է տալիս եղանակին համապատասխան հագնվել, խուսափել ֆիզիկական ծանրաբեռնվածությունից, իսկ սրտանոթային հիվանդներին` առանց հիմնավոր պատճառի քամոտ եղանակին տանից դուրս չգալ:

«Աշնանը կտրուկ ավելանում է ինսուլտների և ինֆարկտների թիվը, դրա համար էլ խորհուրդ է տրվում նաև սքրինիգային հետազոտության անցնել: Վերջին շրջանում, պայմանավորված սոցփաթեթների ընձեռած հնարավորություններով, մարդիկ սկսել են այցելել բժշկի ստուգման նպատակով, որը, սակայն, մարդկանց լայն շրջանակ չի ընդգրկում»,- ասաց բժիշկը:

Վերջին տարիներին սրտանոթային հիվանդությունները նաև երիտասարդացել են: Եթե 20 տարի առաջ, ըստ Օրդյանի, իրենք զարմանում էին, երբ 42 տարեկանի մոտ սրտամկանի ինֆարկտ էր արձանագրվում, ապա հիմա սրտամկանի ինֆարկտ են ունենում նաև 25-30 տարեկանները:

Ի դեպ, իրավիճակը մարզերում և Երևանում նույնը չէ: «Երևանում հիվանդների սոցիալական վիճակն ավելի լավ է, նրանք բժշկի ավելի հաճախ են դիմում, մարզերում պատկերը մի քիչ տխուր է»,- ասաց բժիշկը: