Խաղադաշտից դուրս նույնպես մեծագույն ընկեր էր. Ալյոշա Աբրահամյան

Այսօր տեղի ունեցավ հայկական ֆուտբոլի լեգենդ,  «Արարատ 73»-ի ավագ Հովհաննես Զանազանյանի հոգեհանգստի արարողությունը, որին ներկա էին ՀՖՖ նախագահ Ռուբեն Հայրապետյանը, Երևանի քաղաքապետ Տարոն Մարգարյանը,  երկրպագուներ,  մարզաշխարհի բազմաթիվ ներկայացուցիչներ որոնց շարքում էին նաև «Արարատ 73»-ի ֆուտբոլիստներ Արկադի Անդրեասյանը, Էդվարդ Մարգարովը, Ալյոշա Աբրահամյանը և ուրիշներ:

Yerkir.am-ի հետ զրույցում «Արարատ 73»-ի դարպասապահ  Ալյոշա Աբրահամյանը թարմացրեց հիշողությունները կապված Հովհաննես Զանազանյանի հետ:

«Հիշողությունները շատ են, բայց այն ինչ մնում է դաշտում, դա մեկ հիշողություն է` միայ  հաղթանակ, որը կապված էր իր հետ: Քանի որ նա թիմի ավագն էր, ամբողջ թիմին տանում էր իր ետևից և ոգևորում էր տղաներին, որ կարողանան հաղթանակներ տոնել: Երբեք  չէր սիրում պարտվել, և դա  իր մեծ ազդեցությունն էր թողնում խաղադաշտում: Տղաները բոլոր ուժերն էին դնում հաղթանակի հասնելու համար:Այսքան տարիների ընթացքում իմ ամենամոտ ընկերն է եղել և շատ լավ պահեր ենք ունեցել, որոնք կապված են մեր թիմի հաջողությունների հետ: Դաշտից դուրս նույնպես նա մեծագույն  ընկեր էր, ով բոլորին հասնում  էր օգնության:Հոյակապ անձնավորություն էր և շատ մարդկանց է օգնել, թե խաղադաշտում և թե դրանից դուրս»-ասաց Աբրահամյանը: