Մենք խնդրել կամ սպասել չենք կարող. ՀՀԿ-ականը՝ սահմանին ստեղծված իրավիճակի մասին

ԱԺ պատգամավոր Մկրտիչ Մինասյանն այսօր լրագրողների հետ զրույցում անդրադարձավ ՀՀ նախագահ Սերժ Սարգսյանի` ՄԱԿ-ում ելույթին: Պատգամավորը խոսեց նաև տարածաշրջանային հնարավոր զարգացումների և Ղարաբաղյան կարգավորման գործընթացի մասին:

«ՀՀ նախագահն իր ելույթում հայ ժողովրդի բոլոր մոտեցումները հստակ ներկայացրեց միջազգային հանրությանը: Նա կարևոր շեշտադրումներ արեց: Առաջին հերթին` Արցախի Հանրապետության անունը հնչեցնելն է, նրա նկատմամբ ոտնձգություն անողների նկատմամբ ռազմաքաղաքական վերաբերմունք դրսևորելն է: Այն, ինչ ասվել էր հանրապետության ներսում, նույն ձևով ասվեց համաշխարհային հանրությանը: Այն է` թե ինչու պետք է երկակի ստանդարտներ դրսևորվեն, անհասցե, ոչ կոնկրետ մոտեցումներ դրսևորվեն գործողությունների նկատմամբ, թեև բոլորը հստակ գիտեն, որ այդ ոտնձգությունները կատարվում են Ադրբեջանի իշխանությունների ամբարտավանության և լկտիության պայմաններում` ճնշելու համար ժողովրդական ալիքը, որ բարձրանում է Ադրբեջանում: Հայաստանի նախագահն աշխարհին ասաց, որ եթե շարունակեն նույն կերպ, մենք կոնկրետ և հստակ հակահարված ենք տալու»,- նշեց պատգամավորը:

Yerkir.am-ի հարցին, թե ՀՀ ՊՆ փոխնախարար Դավիթ Տոնոյանի այն հայտարարությունը, որը վերաբերում էր զինադադարի նոր պայմանագրի կնքման անհրաժեշտությանը` Ադրբեջանի այսպիսի ապակառուցողական գործելաոճի դեպքում, ենթադրո՞ւմ է, արդյոք, այդ զինադադարի կնքման պարտադրանք Ադրբեջանին, Մինասյանը պատասխանեց, որ այլ կերպ չի էլ կարող լինել:

«Մենք պարտադրված ենք մեր ոխերիմ հարևաններին պարտադրել խաղաղություն: Մենք խնդրել կամ սպասել չեն կարող: Եթե բանը հասնում է նրան, որ մարդիկ սկսում են լկտիանալ և խաղաղ բնակիչների վրա հրթիռային զենք բաց թողնել, ուրեմն մեր նպատակներն ու միջոցները պետք է լինեն ադեկվատ: Պետք է հասկանալ, որ առաջին փոխնախարարը հենց այնպես հայտարարություն չէր անի»,- ասաց Մինասյանը և հավելեց. «Փոխնախարարը շատ լավ գիտի մեր հնարավորությունները, շատ լավ գիտի նաև հարևանների հնարավորությունները, և վերջին գործողությունները ևս մեկ անգամ ապացուցեցին, որ եթե ազերիների ղեկավարության հրահանգով իրականացվող անմարդկային գործողությունները համապատասխան արձագանքը չստանան, նրանք կարող են շատ ոգևորվել»: