Հիմա էլ առաջարկում են կոռուպցիայի դեմ պայքարի բյուրո ստեղծել

Կոռուպցիայի դեմ պայքարի խորհրդի կողմից հավանության արժանանալուց հետո այսօր առաջին անգամ քաղաքացիական հասարակության ներկայացուցիչներին ներկայացվեցին ՀՀ հակակոռուպցիոն ռազմավարության իրականացման 2015-2018 թվականների միջոցառումների հիմնական ուղղությունները:

«Կոռուպցիայի դեմ պայքարը ոչ միայն պետության խնդիրն է, այլև` բիզնեսի, քաղհասարակության, տեղական ինքնակառավարման մարմինների, քաղաքացիների: Եթե մի քաղաքացի հանդուրժողականություն է ցուցաբերում կոռուպցիոն երևույթների նկատմամբ, դա արդեն անընդունելի է»,- ելույթում ասաց ՀՀ արդարադատության նախարարի տեղակալ Սուրեն Քրմոյանը:

Նրա խոսքով՝ այն անձը, ով հայտնում է կոռուպցիոն հանցագործության մասին, պետք է ունենա բոլոր երաշխիքները, որ չվախենա իր գործողությունները կատարել:

Ըստ փոխնախարարի՝ ծրագրով նախատեսվում է հանրային ծառայողների և պաշտոնատար անձանց ակտիվների հայտարարագրում, ինչպես նաև հայտարարագիր տվող անձանց թվի ավելացում, այդ տեղեկատվության հստակեցում: «Այս տարի մենք բավականաչափ աշխատանքներ ենք կատարել, որը հնարավորություն է տվել էթիկայի հանձնաժողովին վերլուծությյուններ կատարել, տեղեկատվություն ստանալ տարբեր աղբյուրներից»,- նշեց նա:

Ծրագրի նպատակներից է արդյունավետ հանրային կառավարման համակարգի ձևավորումը, իշխանության մարմինների և հանրային ինստիտուտների, մասնավորապես` ֆինանսական գործունեության թափանցիակության բարձրացումը: Հայեցակարգում նախանշված են այն ոլորտները, որտեղ կոռուպցիոն ռիսկերն ավելի շատ են: Դրանք են՝ առողջապահությունը, կրթությունը, պետական եկամուտների կոմիտեն, ոստիկանությունը և այլն:

«Սա չի նշանակում, որ այս ոլորտներում ավելի շատ է կոռուպցիան, պարզապես այս ոլորտներում քաղաքացիներին ծառայություն մատուցելու մասով հանրային ծառայող-քաղաքացի շփումն ավելի շատ է, և այդտեղ կոռուպցիոն երևույթները քաղաքացիների համար ավելի տեսանելի են»,- ասաց Քրմոյանը և հավելեց, որ այս ոլորտներում պետք է միջոցառումներ անցկացվեն:

Նշենք, որ հակակոռուպցիոն ռազմավարության շրջանակներում առաջարկվում է Հայաստանում ձևավորել կոռուպցիայի դեմ պայքարի մասնագիտացած անկախ, ունիվերսալ մարմին՝ Կոռուպցիայի կանխարգելման և դրա դեմ պայքարի բյուրո՝ համապատասխան օրենքի հիման վրա: