Կոռուպցիայի դեմ պայքարի հանձնաժողովը էականորեն տարբերվելու է նախորդներից. արդարադատության նախարար

Կառավարության նիստից հետո լրագրողների հետ զրույցում ՀՀ արդարադատության նախարար Հովհաննես Մանուկյանը, պատասխանելով հարցին, թե ինչո՞վ է զբաղված կոռուպցիայի դեմ պայքարի խորհուրդը, արդյո՞ք բացահայտել է կոռուպցիայով զբաղվող մարդկանց, պատասխանեց. «Կոռուպցիայի դեմ խորհրդի որոշ անդամներ ի պաշտոնե են ընդգրկվում այդ խորհրդի կազմի մեջ` քաղաքացիական հասարակության երկու ներկայացուցիչ և ընդդիմադիր խմբակցությունների ներկայացուցիչներ: Այս պահին հարցում է ուղարկվել ընդդիմադիր խմբակցություններին, որպեսզի նրանք ներկայացնեն թեկնածուներ: Հույս ունեմ, որ ընդդիմադիր խմբակցությունները ներկայացված կլինեն այդ խորհրդի կազմում: Երբ ձևավորվի խորհրդի կազմը, կորոշվեն նաև առաջին նիստի օրը և գործունեության առաջին քայլերը»:

Լրագրողների այն դիտարկմանը, որ մարդիկ չեն վստահում այդ խորհրդին, որ կպայքարի կոռուպցիայի դեմ, նախարարն ասաց. «Հույս ունեմ, որ ծանրակշիռ և փորձառու կազմակերպությունները կմասնակցեն խորհրդի աշխատանքներին,  և մենք կտեսնենք, թե նրանք ինչ մոտեցումներ կունենան»:

Այն մտահոգությանը, որ կոռուպցիայի դեմ պայքարի նոր մարմինը ոչ մի բանով չի տարբերվելու նախորդներից, նախարարը պատասխանեց, որ չի կիսում այդ տեսակետը: «Խորհուրդ եմ տալիս վերցնել նախորդ հանձնաժողովի կազմը և նրանց գործունեությունը կարգավորող որոշումները, ապա համեմատել այս հանձնաժողովի հետ, և դուք կնկատեք էական տարբերություններ»,- ասաց Հովհաննես Մանուկյանը: