Ինչ նախկինում են կատարել, չգիտեմ ու չեմ էլ ուզում իմանալ. Սեյրան Օհանյանը` Սևակ Խաչատրյանին պարգևատրելու մասին

Այսօր պաշտպանության նախարար Սեյրան Օհանյանը հանդիպում ունեցավ Երևանի պետական տնտեսագիտական  համալսարանի ուսանողների հետ: Նախարարը նախ ծավալուն ելույթ  ունեցավ, ապա պատասխանեց ուսանողների հարցերին: Միջոցառման ավարտին նա պարգևատրեցբուհի ներկայացուցիչներին, որոնց թվում էր բուհի պրոռեկտոր Սևակ Խաչատրյանը, ով պարգևատրվեց «Վազգեն Սարգսյան» մեդալով: Հիշեցնենք, որ Սևակ Խաչատրյանը առավելապես հայտնի է քաղաքապետ Տարոն Մարգարյանի ատենախոսության պաշտպանության ժամանակ լրագրողներ նկատմամբ ցուցաբերած վատ վարքով:

Հավելենք նաև, որ այս անգամ էլ տնտեսագիտական համալսարանն աչքի ընկավ լրագրողների հանդեպ անհանդուժողությամբ ու բռնությամբ: Այսպես` երբ լրագրողները ցանկանում էին մոտենալ Սեյրան Օհանյանին, բուհի ուսխորհրդի ներկայացուցիչները սկսեցին հրել լրագրողներին ու նրանց առջև դուռը փակել, որպեսզի լրագրողները հնարավորություն չունենան մոտենալու Սեյրան Օհանյանին:

Այնուհանդերձ, լրագրողներին հաջողվեց հարցեր ուղղել պաշտպանության  նախարարին: Հարցին, թե ինչո՞ւ որոշվեց պարգևատրել վատ վարքագիծ ունեցող Սևակ Խաչատրյանին, ով անգամ չի ծառայել բանակում, Օհանյանը պատասխանեց. «Այսօրվա բոլոր պարգևատրումները համապատասխան աշխատանքի համար են տրվել` բանակ-հասարակություն կապի, բանակ-ուսումնական հաստատություններ կապի շրջանակներում, նաև` ռազմահայրենասիրական դաստիարակության գործում ներդրում ունենալու համար: Ինչ նրանք նախկինում են կատարել, չգիտեմ ու չեմ էլ ուզում իմանամ: Այն պարգևատրումները, որոնք ես կատարում եմ, մանրամասն նայում եմ, նոր հետո հրամանները ստորագրում»:

Լրագրողների դիտարկմանը, որ Սևակ Խաչատրյանը չի ծառայել բանակում, մի՞թե այդքանը բավարար էր Սևակ Խաչատրյանին պարգևատրելու համար, Սեյրան Օհանյանը պատասխանեց, որ Հայաստանում որևէ մեկը չի կարող անօրեն կերպով ազատվել ծառայությունից, և այն քաղաքացիները, ովքեր թեկնածուական են պաշտպանել, օրենքով են ազատվում զինվորական ծառայությունից:

«Բայց նրանք այսօր իրենց գործունեությունն են իրականացնում` հաջակցություն բանակի ու հասարակության: Այդպիսի մեդալներ տրվում են նաև հասարակական գործունեության ժամանակ, որոնք ուղղված են ռազմահայրենասիրական դաստիարակության ամրապնդմանը»,- ասաց նա: