Սեյրան Օհանյանը օրինակ բերեց «նախկինում գողական վերնախավ ունեցող» հարևան Վրաստանը

Այսօր ՕՐՕ դաշինքը քարոզարշավ է իրականացնում Կոտայքի մարզի Հրազդան քաղաքում:  ԱԳ նախկին նախարար Վարդան Օսկանյանը ներկայացրեց իր պաշտոնավարման ձեռքբերումները` միաժամանակ շեշտելով, թե այս իշխանությունների նպատակը պաշտոնն է ու փողը:

«Ինչո՞ւ դուք ձեր ձայնը մեզ պետք է տաք, որովհետև ձեր առաջ կանգնած են երեք նվիրյալ, ազնիվ մարդիկ: Ձեր առաջ մարդիկ են կանգնած, ովքեր ճանապարհ են անցել և իրենց ոլորտներում հաջողություններ արձանագրել: Սեյրան Օհանյանն իր առողջությունն է զոհաբերել երկրի պաշտպանության համար, բանակ կառուցելու համար: Ահավասիկ, տվեք ձեր ձայնը մեզ, և ես վստահեցնում եմ, որ չեք փոշմանելու»,- ասաց նա:

Իսկ  պաշտպանության նախկին նախարար Սեյրան Օհանյանը օրինակ բերեց հարևան Վրաստանը, որը նախկինում գողական վերնախավ ուներ, սակայն Սահակաշվիլին կտրուկ և կոշտ բարեփոխումներ իրականացրեց, որոնք տվեցին իրենց արդյունքը` վերացավ կոռուպցիան: Մինչդեռ Հայաստանը հետ  է մնում Վրաստանից:

«Մեզ էլ են պետք կտրուկ բարեփոխումներ, իշխանական վերնախավի փոփոխություն: Ես այսօր պատրաստ եմ առաջնորդել, որ Հայաստանում կարգ ու կանոն հաստատվի, կոշտ բարեփոխումներ իրականացվեն: Մեր ղեկավարումը կլինի մարդակենտրոն: Մենք պատրաստ ենք գնալ մինչև վերջ: Ես ամբողջ կյանքում ղեկավարվել եմ մի սկզբունքով. «Կյանքս` հայրենիքիս, պատիվս` ոչ մեկին»»,- ասաց նա: