Մահացել է ժողովրդական արտիստ Վարդուհի Խաչատրյանը

ՀՀ մշակույթի նախարարությունը տեղեկացնում է, որ ս. թ. օգոստոսի 23-ին, 88 տարեկանում, կյանքից հեռացել է ՀԽՍՀ ժողովրդական արտիստ, երգչուհի Վարդուհի Խաչատրյանը:

ՀՀ մշակույթի նախարարության աշխատակազմի հասարակայնության հետ կապերի բաժնից հայտնում են, որ Վարդուհի Խաչատրյանի մահվան կապակցությամբ կստեղծվի թաղման կառավարական հանձնաժողով:

Վարդուհի Խաչատրյանը ծնվել է Գյումրիում։ 18 տարեկան հասակում տեղափոխվել է Երևան։ 1945-1948 թվականներին սովորել է Երևանի Ռոմանոս Մելիքյանի անվան երաժշտական ուսումնարանի վոկալի բաժնում, 1949-1951թվականներին՝ Երևանի Կոմիտասի անվան պետական կոնսերվատորիայում։ Դասավանդել է, եղել է պրոֆեսոր։ Համերգներով եղել է աշխարհի տարբեր երկրներում, արժանացել մի շարք մրցանակների:

Նրա ստեղծագործական գործունեությունը կապված էր Թաթուլ Ալթունյանի անվան երգի-պարի պետական և Արամ Մերանգուլյանի անվան ժողովրդական նվագարանների պետական անսամբլների հետ: Կատարել է Նիկոլ Գալանդերյանի, Ռոմանոս Մելիքյանի, Անտոն Մայիլյանի ռոմանսներից: Երգացանկից առավել հայտնի են «Մախմուր աղջիկ», «Տավիղ» և այլ կատարումներ: Երգչուհու մի շարք կատարումներ հայկական կատարողական արվեստի ոսկե ֆոնդում են գրանցվել, հատկապես` հայկական ռոմանսների կատարումները:  1982թ. արժանացել է Հայաստանի ժողովրդական արտիստի կոչման: