Կ.Պոլսում հարգել են Ցեղասպանության ժամանակ կախաղան հանված 20 հնչակյանների հիշատակը

Կ.Պոլսում հարգել են 1915 թվականի հունիսի 15-ին Բայազետի հրապարակում կախաղան բարձրացված` Հնչակյան կուսակցության անդամ 20 հայ սոցիալիստների հիշատակը. տեղեկացնում է Demokrathaber-ը:

«Նոր Զարթօնք» միության նախաձեռնությամբ երեկ Էդիրնեքափը հայկական որբանոցում հարգել են նրանց հիշատակը: Հուշ-միջոցառմանը մասնակցել են Թուրքիայի հայ համայնքի ներկայացուցիչներ, թուրքահպատակ սոցիալիստներ:

Միջոցառման ընթացքում պարզվել է պաստառ, որում ներկայացվել է «Իթթիհատ և թերաքի»-ի ղեկավարների դեմ մահապատիժ կազմակերպելու փորձ անելու մեղադրանքով ձերբակալված և Կ.Պոլսի կենտրոնական բանտի նկուղում շղթայված ու մեկ տարի շարունակ իր դատավարությանը սպասող` Հնչակյան կուսակցության ղեկավար Փարամազ Մաթեոս Սարգիսյանի և նրա 19 կուսակիցների լուսանկարները:

Պաստառներ են պարզվել նաև Փարամազի՝ մահապատժի ենթարկվելուց առաջ բացականչած խոսքերով` «Մեր մարմինները կարող եք վերացնել, սակայն մեր իդեալիզմը՝ երբեք: Մեր իդեալիզմը մեր սոցիալիզմն է: Կեցցե սոցիալիզմը»:

Միջոցառման ընթացքում ընթերցվել են նաև Վահան Թեքեյանի, Նշան Բեշիքթաշլյանի և այլ հայ մտավորականների բանաստեղծությունները: