Շշերի արտադրամասի հրդեհն ահռելի վնաս է հասցրել պատգամավորի բիզնեսին

Լուսադեմին Բալահովիտում գտնվող շշերի արտադրամասում տեղի ունեցած հրդեհն ահռելի վնաս է պատճառել արտադրամասի սեփականատիրոջը՝ ԱԺ պատգամավոր Մելիք Մանուկյանի բիզնեսին: Այս մասին yerkir.am-ի հետ զրույցում ասաց պատգամավորը:

Նկարագրելով դեպքը՝ Մանուկյանը պատմեց, որ ամեն բան եղել է հանկարծակի: «Մի մետր բարձրության  վաննա ա, մեջը` մի մետր բարձրության լավա ա, տակից ծակվել ա, չեն նկատել, թափել ա, չեն հասցրել դեմն առնել: Դա անկանխատեսելի բան ա, ոչ մեկ չի կարա կանխատեսի դա»,- ասաց նա և հավելեց, որ արդյունքում` շիկացած ապակու 30 տ հումք է արտահոսել, ինչն էլ հանգեցրել է հրդեհի:

Պատգամավորը նշեց, որ ներկայումս իրենք հաշվարկներ են անում՝ պարզելու համար ստացած պատճառված վնասը:

Մանուկյանի խոսքով՝  վաննան 7 տարին մեկ փոխում են և ամեն տարի ստուգում անցկացնում: «Չորսուկես տարի է,  ինչ շահագործվում էր, դրա մի մասը (նկատի ունի վաննայի), որ մի թեթև անորակ եղավ, կտա՝ ընթացքում կմաշվի, ամեն տարի աշխատանքները կանգնեցնում ենք, ստուգում»,- ասաց նա և հավելեց. «Փառք Աստծո, որ մարդկանց բան չի եղել»:

Նշենք, որ հրշեջներից մոտ մեկուկես ժամ է պահանջվել հրդեհը մարելու համար: