Կիևում միասեռականների երթն ավարտվել է սկսվելուց կես ժամ անց

Կիևում անցկացվել է միասեռականների «Հավասարության երթ»: lenta.ru-ի փոխանցմամբ, երթն ավարտվել է այն սկսվելուց կես ժամ անց: Երթի շուրջ 300 մասնակիցներ քայլել են 500 մետր, որից հետո նրանց կանգնեցրել է ոստիկանությունը՝ «անվտանգության նկատառումներից ելնելով»։

Երթի կազմակերպիչները զգուշացրել են ակտիվիստներին` ցրվել փոքր խմբերով, չմտնել մետրո և չլինել այնտեղ, որտեղ շատ են մարդկանց կուտակումները։

Երթը սկսելուց հետո շուրջ 40 ծայրահեղականներ են հարձակվել ակտիվիստների վրա և պայթուցիկներ նետել նրանց ուղղությամբ. արդյունքում վնասվածք է ստացել 1 ոստիկան, ով հոսպիտալացվել է։ Կարմիր խաչի ներկայացուցիչները տեղեկացրել են, որ ոստիկանը պարանոցի ծանր վնասվածք է ստացել. վնասվել է վերջինիս պարանոցի երակը: Իրավապահները ձերբակալել են ավելի քան 10 ցուցարարի: