Մեկը դեղի վրա նստած է, որ կես ժամ ուշանա, ինչ ասես կգրի. Սեդրակյան

Նախագահի թեկնածու Պարույր Հայրիկյանի դեմ կատարված մահափորձն իր անվան հետ կապելը նախագահի մեկ այլ թեկնածու, էպոսագետ Վարդան Սեդրակյանը բացատրում է նրանով, որ փորձ է արվում քարոզարշավի ընթացքում բարոյահոգեբանորեն չեզոքացնել իրեն:

«Ես փոխանակ իմ ծրագրերը ներկայացնեմ, ուղիղ մեկ շաբաթ զբաղված եմ միայն Սամվելի ու Խաչիկի հարցերով: Դրանից ավել էլ ի՞նչ էիք ուզում, որ անեին»,- լրագրողների հետ հանդիպման ժամանակ հայտարարեց Վարդան Սեդրակյանը:

Նա վստահ է, որ իր համախոհներն ավելացել են, եւ դա եւս անհանգստացրել է իշխանություններին:

Հարցին, թե, այդուհանդերձ, ի՞նչ է կարծում` ձերբակալված երկու տղանե՞րն են Հայրիկյանի մահափորձի իրական կատարողները, նախագահի թեկնածուն հայտարարեց. «Խաչիկի մասով չեմ կարող ասել, Սամվելն անգամ բանակ չի գնացել, զենքը երեւի հեռուստացույցով է տեսել, շատ լավ արհեստավոր է, բայց որ գնա մարդ սպանի` չգիտեմ: Չեմ հիշում` Սամվելն 8-րդ դասարանն ավարտե՞ց, թե՞ չէ: Մեկը, կարծեմ, 8-ի Բ-ն է ավարտել, մյուսն էլ` 7-ի Գ-ն: Հիմա էս մարդկանց, որ հարցաքննում են, փաստաբան ունե՞ն: Ինչ ասես` կարող են գրել տալ: Մեկը նստած է դեղի վրա, որ կես ժամ ուշանա` կգրի, էն մեկին էլ էնքան կծեծեն` ինչ ուզես կգրի»:

Հարցին էլ, թե` մահափորձի ժամանակահատվածում շփումներ ունեցե՞լ է այդ երկու տղաների հետ, Սեդրակյանը նախ ծիծաղալելով հայտարարեց` հա, կողքի փողոցում սպասում էի իրենց, իսկ հետո ավելի լուրջ հայտարարեց, որ սեփական տներում ապրողներն, ի տարբերություն, շենքերում ապրող մարդկանց, իրենց հարեւանների հետ շփվում են: Նա հայտարարեց նաեւ, որ այս ընթացքում հասարակությանը պետք է կարողանա հստակ ապացուցել, որ ինքը կապ չունի այս մահափորձի հետ, եւ գուցե իշխանությունները փոխեն իրեն ձերբակալելու ծրագրերը: Այս պահի դրությամբ` Սեդրակյանը վստահ է, որ իրեն կձերբակալեն:

Հարցին` գուցե անիմա՞ստ աղմուկ է բարձրացնում, Սեդրակյանը պատասխանեց, որ անիմաստ չէ, եւ որ մարդու անունն ու ազատությունն արժեն, որ աղմուկ էլ բարձրացնես:

«Պետք է գտնվի այդ կազմակերպիչը: Պետությունը, ի վերջո, չի կարող գործն այնպես թողնել, որ Սամոն ու Խաչոն որոշեցին գնալ ու Հայրիկյանին խփել: Եվ հիմա ուզում են այնպես անել, որ այդ «կազմակերպիչը» ես դուրս գամ»,- հայտարարեց նախագահի թեկնածուն: