Թոքմաջյանն առաջիկայում տեսանյութերով կպատասխանի լրագրողների հարցերին

Տեղեկացրել էինք, որ այսօր ՀՀ ԿԳ նախարար Արմեն Աշոտյանը tert.am-ի հետ զրույցում անդրադարձել էր նաև առաջիկայում կայանալիք` Հայաստանի ազգային պոլիտեխնիկական ինստիտուտի ընտրություններին: Նախարարն, ըստ երևույթին, որոշակի մեսիջ էր հղել բուհի ռեկտորի պաշտոնակատար Հովհաննես Թոքմաջյանին:

Yerkir.am-ի հետ զրույցում Թոքմաջյանը նշեց, որ առաջիկայում կկազմակերպի մամուլի ասուլիս, որի ժամանակ էլ կպատասխանի բոլոր հարցերին: «Փակ թեմաներ չեն մնալու, բոլոր հարցերը ստանալու են իրենց պատասխանները, նույնիսկ` տեսանյութերի միջոցով»,- ասաց նա:

Հարցին, թե ինչպե՞ս կբացատրի այն փաստը, որ ԵՊՀ-ի և ԵՊԲՀ-ի ռեկտորների ընտրություններին դեռ մեկական թեկնածու է առաջադրվել, իսկ պոլիտեխնիկի դեպքում արդեն երկու թեկնածու կա, Թոքմաջյանը պատասխանեց, թե չի բացառվում, որ թեկնածուների թիվն ավելանա: «Էդ երկուսը կարող է էլի ավելանալ: Այս ամենն իր պատասխանն ունի, որը արդեն մամլո ասուլիսու կներկայացնեմ»,- ասաց նա: