Ցավոք, մենք այսօր շատ քիչ ենք խոսում մեր կրթական համակարգի որակի մասին. Արամ Սիմոնյան

Եվրոպական բարձրագույն կրթական տարածքի նախարարական գագաթաժողովի և Բոլոնիայի քաղաքականության 4-րդ ֆորումի ընթացքում լրագրողների հետ զրույցում ԵՊՀ ռեկտորի պաշտոնակատար Արամ Սիմոնյանը նշեց, որ Հայաստանի կրթական համակարգը դարձել է ավելի ճկուն, ավելի դյուրազգաց փոփոխությունների նկատմամբ:

Ըստ նրա` Բոլոնիայի հիմնական նպատակը կոնկրետ մեր երկրի համար բարձրագույն կրթական մակարդակը եվրոպական գիտակրթական ընդհանուր տարածքի մաս դարձնելն է: «Իհարկե, Խորհրդային միության կրթական համակարգը շատ բարձր էր, բայց ասել, որ մենք այսօր ավելի ցածր մակարդակի վրա ենք, քան խորհրդային կրթական համակարգն էր, սխալ է: Մենք շատ ավելի առաջ ենք անցել, և այստեղ շատ մեծ է Բոլոնիայի կրթական համակարգի դերը»,- ասաց Սիմոնյանը:

Ըստ նրա` կրթության նոր համակարգը պահպանել է հին կրթական համակարգի լավագույն մասերը: Սիմոնյանի հավաստմամբ` մեր բարձրագույն կրթության համակարգը ավելի է մոտեցել հասարակությանը, ուսանողների պահանջմունքների բավարարմանը` դառնալով ավելի հասկանալի ու ընդունելի, ավելի թափանցիկ ու վերահսկելի:

«Ուսանողն այսօր ընտրության հնարավորություն ունի: Ցավոք, մենք այսօր շատ քիչ ենք խոսում մեր կրթական համակարգի որակի մասին: Կրթական համակարգում մենք ունենք բազում խնդիրներ, բայց մեր բարձրագույն կրթության համակարգը դրական առումով անհամեմատելի է նախկինի հետ»,- նշեց Սիմոնյանը: