Երևանում մեկնարկեց Ընկերվար երիտասարդների միջազգային միության համաշխարհային խորհրդի ժողովը (ԼՈՒՍԱՆԿԱՐՆԵՐ)

Այսօր Երևանում մեկնարկեց Ընկերվար երիտասարդների միջազգային միության համաշխարհային խորհրդի ժողովը (IUSY World Council): Ժողովին մասնակցում էին աշխարհի շուրջ 60 երկրների 160 երիտասարդ սոցիալիստներ , ինչպես նաև ՀՅԴ Հայաստանի և սփյուռքի երիտասարդական և ուսանողական միությունների ներկայացուցիչներ:

Նշենք, որ մեկուկես տարի առաջ ՀՅԴ երիտասարդական միությունն առաջարկել էր ժողովն անցկացնել Հայաստանում, ինչը և ընդունվել էր: Հայոց ցեղասպանության 100-րդ տարելիցի կապակցությամբ Հայաստանում հյուրընկալվող ժողովի ընթացքում ելույթով հանդես եկան Ը.Ե.Մ.Մ-ի նախագահ Ֆելիպե Խելդերեսը, ՀՅԴ Բյուրոյի նախկին անդամ, Ընկերվար-Միջազգայնականի (Սոցինտերն) փոխնախագահ Մարիո Նալբանդյանը և այլ բարձրաստիճան հյուրեր: «Հավասար աշխարհ հնարավոր է» կարգախոսի ներքո անցկացվող երկօրյա ժողովի օրակարգը քննելու է մարդու հիմնարար իրավունքների իրացման գործում երիտասարդության դերի, վերջինիս զբաղվածության, աշխատունակության և այլ հարցեր: Ժողովում կքննարկվեն աշխարհի առջև ծառացած բնապահպանական խնդիրները` աշխարհի կայուն զարգացման հեռանկարում:

Նշենք, որ վաղը հյուրերը կայցելեն Ծիծեռնակաբերդ և հարգանքի տուրք կմատուցեն Մեծ եղեռնի զոհերի հիշատակին: