ԲՀԿ մամլո խոսնակը չի միացել Գոհար Ենոքյանի խափանման միջոցը փոխելու ստորագրահավաքին

ԲՀԿ մամուլի խոսնակ Վահան Բաբայանն այսօր լրագրողների հետ հանդիպման ընթացքում, անդրադառնալով նախկին պատգամավոր, ԲՀԿ-ական Գոհար Ենոքյանի ձերբակալությանը, նշեց, որ այդ առիթով իր տեսակետը մեկն է` գործը գտնվում է հատուկ քննչական ծառայության և իրավապահ մարմինների ուշադրության կենտրոնում, ուստի ինքը չի կարող իրավական գնահատականներ տալ:

«Բարոյական մասով միայն կարող եմ դիտարկումներ անել: Հայտնի է արդեն, որ պատգամավորների կողմից ստորագրահավաք էր սկսվել` դիմել գլխավոր դատախազին` խափանման միջոցը փոխելու համար: Ես անձամբ տեխնիկապես չեմ հասցրել մասնակցել ստորագրահավաքին, բայց կարծում եմ` դա մարդասիրական քայլ է: Քանի որ տիկին Ենոքյանը 73 տարեկան կին է, կարծում ենք, որ նրա առողջական վիճակն էլ պետք է հաշվի առնել: Բայց կոնկրետ գործի վերաբերյալ զերծ կմնամ գնահատականներ տալուց»,- ասաց Բաբայանը:

Ուշագրավ է, որ նա այդպես էլ չպարզաբանեց, թե ինչ տեխնիկական խնդիրների պատճառով է, որ չի միացել ստորագրահավաքին, և սա այն դեպքում, երբ երեկ ԱԺ-ում էր:

Հարցին, թե` ի վերջո, իր կարծիքով, Գոհար Ենոքյանն արդյոք ունա՞կ էր նման հանցագործություն կատարել, Բաբայանը պատասխանեց. «Ես չեմ կարող անհատապես ասել` մարդիկ ունակ են, թե ունակ չեն: Ես ԱԺ պատգամավոր եմ և ԲՀԿ-ի մամուլի խոսնակը և չեմ կարող անհատական կարծիք հայտնել: Քանի կա իրավական մոտեցումը, մարդկային մոտեցումներն այս հարցում երկրորդական են»: