Համայնքների խոշորացումից ի՞նչ է ստանալու բնակիչը. ԱԺ-ում լսումներ են

Այսօր ԱԺ-ում ընթանում են խորհրդարանական լսումներ համայնքների խոշորացման վերաբերյալ:

ԱԺ տարածքային կառավարման հարցերի հանձնաժողովի նախագահ, ԲՀԿ խմբակցության պատգամավոր Ստեփան Մարգարյանը նախ նշեց, որ քննարկման առարկա է շատ լուրջ թեմա, որովհետև համայնքների խոշորացումը պետության կյանքում ամենակարևոր մասշտաբային ռեֆորմներից է: Նա նշեց, որ փորձագետները պատրաստել են տեղեկանք ՝ ուսումնասիրելով նախորդ և ներկա ժամանակաշրջանի վիճակը՝ համայնքների խոշորացման համատեքստում:

Ստեփան Մարգարյանի դիտարկմամբ` այսօր Հայաստանն ունի թույլ ինքնակառավարման համակարգ՝ ֆինանսական հնարավորությունների ու բնակչության կողմից օբյեկտիվ վերաբերմունքի առումով: Ուսումնասիրվել է այլ երկրներում համայնքների խոշորացման հարցը, մասնավորապես՝ Վրաստանի օրինակը, և այնտեղ մի համակարգ է գործում, որի վերաբերյալ ոչ ոք չգիտի՝ այն երկարատև կլինի, թե` ոչ, ուսումնասիրվել է նաև Լիտվայի փորձը:

Ստեփան Մարգարյանը նշեց, որ փորձ է արվել ուսումնասիրել ազգաբնակչության տրամադրությունները և կարծիքը. այստեղ բարդ էր գտնել ու բացահայտել գերակշռող կարծիքը, քանի որ արձանագրվեց, որ ազգաբնակչության մոտ պատկերացումների բացակայություն կա, նրանք պատասխանում են` կա'մ միանշանակ ոչ, կա'մ այո:

«Ազգաբնակչության մոտ գերակշռում է հետևյալ հարցը` «իսկ ի՞նչ եմ ստանում ես` որպես համայնքի բնակիչ, համայնքների խոշորացումից», և այդ հարցերի պատասխանը պետք է կարողանալ տալ»,- ասաց պատգամավորը: