Հավաքականը պետք է գլխավորի հայ մասնագետ. ՀՖՖ վերընտրված նախագահ Ռուբեն Հայրապետյան

Այսօր «Արմենիա-Մարիոթ» հյուրանոցում անցկացվեց ՀՖՖ 13-րդ ժողովը, որի ընթացքում կայացան ՀՖՖ նախագահի ընտրությունները: Միակ թեկնածուն` ՀՖՖ գործող նախագահ Ռուբեն Հայրապետյանը, ընտրվեց միաձայն:

Ռուբեն Հայրապետյանն անդրադարձավ Հայաստանի ազգային հավաքականի գլխավոր մարզչի խնդրին եւ հայտարարեց, որ հավաքականը պետք է գլխավորի հայ մասնագետ:

«Ժամանակին ունեինք հավաքական, որտեղ խաղում էին Քարամյան եղբայրների, Ռոմիկ Խաչատրյանի նման տուրիստներ: Ներկայիս կազմում եւս ունենք ֆուտբոլիստներ, որոնք տուրիստի կարգավիճակով են գալիս հավաքական: Նրանց անպայման ցույց կտանք հեռանալու դուռը: Հայաստանի ազգային հավաքականը պետք է գլխավորի հայ մասնագետ: Ընկա երկրպագուների ազդեցության տակ եւ հրավիրեցի արտասահմանցի մարզչի: Այլեւս վստահ եմ, որ ազգային ընտրանուն կարող է օգուտ տալ միայն հայ մասնագետը, որը կիմանա ում համար խաղալ եւ ինչի համար խաղալ: Խոստանում եմ՝ հավաքականը շուտով կունենա նոր մարզիչ»,- ասաց Հայրապետյանը: