Ավետիսյանների ընտանիքի սպանության գործի վերաբերյալ հարցեր՝ ԱԺ-ում

Այսօր կառավարության հետ հարցուպատասխանի ժամանակ ԱԺ պատգամավոր Զարուհի Փոստանջյանը հարց ուղղեց կառավարությանը, թե արդյո՞ք հետևում են Ավետիսյանների ընտանիքի սպանության գործին, հարցեր չե՞ն բարձրացնում, թե ինչո՞ւ ԱԱԾ-ն և ոստիկանությունը չկարողացան ձերբակալել Պերմյակովին և ինչո՞ւ հիմա չեն գնում ու ձերբակալում նրան, մինչդեռ` քաղաքական հայացքների համար ձերբակալում են Հիմնադիր խորհրդարանի անդամներին:

Արդարադատության նախարար Հովհաննես Մանուկյանը պատասխանեց, որ կառավարությունն ունի այն լիազորությունները, որոնք տրված են նրան Սահմանադրությամբ և օրենքներով: Ինչ վերաբերում է վերջին օրերի զարգացումներին, նախարարը նշեց, որ կառավարությունը ձեռնպահ կմնա հայտարարություն անելուց` նկատի ունենալով, որ հետաքննության պրոցես է ընթանում:

Զարուհի Փոստանջյանը արձագանքեց, որ ամբողջ ժողովուրդն էր սպասում, թե երբ է գլխավոր դատախազ Կոստանյանը դիմելու իր ռուս գործընկերոջը՝ Պերմյակովին Հայաստանի իրավապահ մարմիններին փոխանցելու պահանջով: «Դիմե՞լ է նա, թե՞ ոչ, և ո՞րն է դրա պատասխանը»,- հարցրեց պատգամավորը:

Նախարարը պատասխանեց. «Ես համաձայն չեմ, որ իրավապահ մարմինները անգործության են մատնված, նման երևույթ չկա, կառավարությունն անում է ամեն ինչ, որ քաղաքացու իրավունքները պաշտպանված լինեն»:

Հովհաննես Մանուկյանը ակնարկեց, որ պատգամավորը գլխավոր դատախազին առաջիկայում հարցեր ուղղելու հնարավորություն կունենա, երբ Գևորգ Կոստանյանը  ԱԺ-ին կներկայացնի դատախազության տարեկան գործունեությունը: