Համագումարի ընթացքում ամեն ինչ պարզ կլինի. Նաիրա Զոհրաբյան

ԲՀԿ մամուլի քարտուղար Նաիրա Զոհրաբյանը, անդրադառնալով ԲՀԿ-ի առաջիկա համագումարին, ասաց, որ այն փակ է լինելու: «Փակ համագումարի նախադեպ դեռևս անցած տարի է եղել»,- ասաց նա՝ հավելելով. «Կարծում եմ, որ ստեղծված իրավիճակից հետո մենք պետք է հավաքվենք և քննարկենք բավական լուրջ խնդիրներ: Համագումարը փակ է լինելու, բայց համագումարից հետո ես և իմ մի քանի գործընկերներ դուրս կգանք և կպատասխանենք լրագրողների այն հարցերին, որոնց տվյալ պահին պատրաստ կլինենք պատասխանել կամ էլ կունենանք պատասխան»:

Նաիրա Զոհրաբյանը չցանկացավ անդրադառնալ այն հարցին, թե համագումարի օրակարգում կա՞, արդյոք, ԲՀԿ նախագահի ընտրության հարցը, թե՞ ոչ : «Համագումարի ընթացքում ամեն ինչ պարզ կլինի»,- նշեց նա:

ԲՀԿ քարտուղարն անդրադարձավ նաև ԲՀԿ-ական պատգամավոր Ռուստամ Գասպարյանի՝ ԲՀԿ-ից դուրս գալու հավանականությանը: «Ես զրուցել եմ Ռուստամ Գասպարյանի հետ, և նա նման որևէ մտադրության մասին ինձ չի ասել»,- ասաց Նաիրա Զոհրաբյանը: