Առաջիկա երկու օրերի ընթացքում ամեն ինչ պարզ կլինի. Վահրամ Բաղդասարյան

ՀՀԿ խմբակցության ղեկավար  Վահրամ Բաղդասարյանը Yerkir.am-ի հետ զրույցում հայտնեց, որ առայժմ իրենք էլ չեն կարողանում հասկանալ` ո՞րն է լինելու էլեկտրաէներգիայի սակագնի բարձրացման դեմ շարունակական ցույցերի հանգուցալուծումը:

«Մենք ուզում ենք հասկանալ` ցուցարարներն ունե՞ն  հստակ պահանջ, թե՞ պարզապես սա մի երևույթ է,  որն ուզում են շարունակել: Կառավարությունն անում է որոշակի քայլեր, նաև կլինի հայտարարություն` հնարավորության սահմաններում»,- ասաց նա:

Հարցին, թե ի՞նչ հայտարարության մասին է խոսքը, Վահրամ Բաղդասարյանը պատասխանեց. «Դե, ուսումնասիրում է կառավարությունը: Անապահով խավի համար ինչ-որ բան արվեց, աուդիտի հարցն արդեն երկկողմանի հանաձայնության փուլում է: Եթե այս ամեն ինչն այսօր չհասկանան, ինձ թվում է արդեն որոշումներ կկայացվեն, որովհետև այսպես շարունակել հնարավոր չէ»:

Հարցին, թե մինչև աուդիտի կազմակերպումը հնարավո՞ր է կասեցնել էլեկտրաէներգիայի սակագնի բարձրացումը, պատգամավորը պատասխանեց, որ «կասեցում» բառը պետք չէ օգտագործել: «Այստեղ կարելի է այլ տերմին օգտագործել, ասենք` հետաձգել»,- նշեց նա` հավելելով. «Առաջիկա երկու օրերի ընթացքում ամեն ինչ պարզ կլինի: Բոլոր հնարավոր տարբերակները նայում ենք: Մենք պետք է միջոցներ գտնենք, գումար հայթայթենք: Եթե հնարավոր լինի գումար հայթայթել, խնդիրը լրիվ ուրիշ փուլ կմտնի: Այստեղ խնդիրը գումարի մեջ է»: