Հայկական ֆուտբոլի խնդիրներն ու ՀՖՖ նախագահի «գաղտնի» ասուլիսը

ՀՖՖ պաշտոնական կայքը տեղեկացնում է, որ քիչ առաջ ՀՖՖ Տեխնիկական կենտրոնում՝ Ֆուտբոլի ակադեմիայում, տեղի է ունեցել  ՀՖՖ Գործկոմի նիստը՝ ՀՖՖ նախագահ Ռուբեն Հայրապետյանի նախագահությամբ:  Օրակարգում ընդգրկված հարցերի թվում էին «Գանձասար» ֆուտբոլային ակումբի մարզիչների և ֆուտբոլիստների կողմից ներկայացված դիմումների, ինչպես նաև ստեղծված արտակարգ իրավիճակի քննարկումը, մանկապատանեկան առաջնությունների կազմակերպման կանոնակարգման և մանկապատանեկան ֆուտբոլի զարգացման գործընթացում կատարվելիք փոփոխությունների առաջարկը և այլն:  Կայքի հաղորդմամբ՝ ՀՖՖ Գործկոմի նիստից հետո ՀՖՖ նախագահ Ռուբեն Հայրապետյանը պատասխանել է  լրագրողների հարցերին:

Որքան էլ տարօրինակ է, ՀՖՖ Գործկոմի նիստը լուսաբանելու համար հրավիրվել են միայն մի քանի լրատվամիջոցների ներկայացուցիչներ, իսկ նիստից հետո Ռուբեն Հայրապետյանը պատասխանել է հենց այդ մի քանի ՝ նախընտրելի լրագրողների հարցերին: Հատկանշական է, որ այս մասին ՀՖՖ մամուլի ծառայությունը նախապես պատշաճ կարգով չի ծանուցել  ԶԼՄ-ներին տեղի ունենալիք միջոցառման և հատկապես՝ ՀՖՖ նախագահի ասուլիսի մասին:  

Ինչո՞ւ: Ի՞նչ ունեին ՀՖՖ-ում թաքցնելու մարզասեր հասարակությունից,  կամ ինչպե՞ս  են  ստանում լրատվամիջոցները  «ցանկալի» և «ոչ ցանկալի»  որակավորումը: Հիշեցման կարգով նշենք,  որ Ռուբեն Հայրապետյանի նախորդ ասուլիսի մասին  էլ ՀՖՖ մամուլի ծառայությունը  ԶԼՄ-ներին տեղյակ պահեց ասուլիսի մեկնարկից մոտ 4 ժամ առաջ: 

Ի դեպ, ՀՖՖ պաշտոնական կայքում հրապարակված տեսանյութից երեւում է, որ ՀՖՖ նախագահը  մի քանի լրատվամիջոցների  ներկայացուցիչների հետ զրույցում  խոսել է միայն գործկոմի նիստում քննարկված որոշ թեմաների մասին: Այս ամենից կարելի է ենթադրել, որ ՀՖՖ նախագահը չի ցանկանում, որ ասուլիսին ներկա լինեն «ոչ ցանկալի» լրատվամիջոցների  ներկայացուցիչներ, քանի որ այս կերպ ավելի հեշտ կլինի շրջանցել հայկական ֆուտբոլի առկա խնդիրների մասին թեման:  Իսկ հայկական ֆուտբոլի, հատկապես` ներքին առաջնության խնդիրների մասին կարելի է երկար խոսել:

Ըստ երևույթին` ՀՖՖ ղեկավարի և նրա ծառայակիցների համար հայկական ֆուտբոլում առկա խնդիրների պատճառը հենց լրագրողներն են: Նրանք են մեղավոր այդ ասպարեզում ստեղծված «գաղջ մթնոլորտի» համար, և բնական է, եթե նրանք, այսինքն՝ մենք, տեղյակ չլինենք ոչնչից, չլուսաբանենք, խնդիրները չբարձրաձայնենք, լուծումներ չփնտրենք, ապա  հայկական ֆուտբոլում վիճակը այլ կլինի: Շատ ծանոթ իրավիճակ է:

Հիշո՞ւմ եք, ֆուտբոլի աշխարհի առաջնության օրերին  Հյուսիսային Կորեայի թիմը, ըստ հյուսիսկորեական մամուլի, եզրափակիչում ջախջախիչ հաղթանակ տոնելով,  դարձավ Աշխարհի չեմպիոն: Այսպես շարունակվելու դեպքում մերոնք հաստատ ժամկետից շուտ  ձեռք կբերեն Եվրոպայի առաջնության եզրափակիչում խաղալու իրավունքը: Իսկ գուցե արդեն Եվրոպայի չեմպիո՞ն ենք: Ասեք` իմանանք, պարոնա'յք, կիսեք ձեր ուրախությունը հանրության հետ: Չէ՞ որ մեր հասարակությանը հաղթանակները օդ ու ջրի պես անհրաժեշտ են: Ասեք` իմանանք, ուրախանանք: Էգոիզմը լավ բան չէ:  

Երվանդ ՀԱԿՈԲՅԱՆ

Լուսանկարը՝ ՀՖՖ պաշտոնական կայքի